دوای‌ ئه‌وه‌ی‌ ئه‌مڕۆ ته‌قینه‌وه‌یه‌ له‌ شاری‌ هه‌ولێر رویدا، حکومەتی هەرێمی کوردستان له‌ راگه‌یاندراوێكدا بە توندی ئیدانەی ئەو کردەوە تیرۆریستییە دەکات.

ده‌قی‌ په‌یامه‌كه‌ی‌ حكومه‌تی‌ هه‌رێمی‌ كوردستان:

حکوومەتی هەرێمی کوردستان بە توندی ئیدانەی ئەو کردەوە تیرۆریستییە دەکات کە نیوەڕۆی ئەمڕۆ لەبەردەم باڵەخانەی پارێزگای هەولێر ئه‌نجام درا و بووە هۆی شەهیدبوونی 4 کەس و برینداربوونی 29 کەسی دیکە.
به‌م بۆنه‌یه‌وه‌ پرسە وسەرەخۆشی‌ ئاراستەی کەسوکاری شەهیدان دەکەین و هیوای زووچاکبوونەوە بۆ برینداران دەخوازین، بە هاووڵاتیانی بەڕێزی هەرێمی کوردستانیش ڕادەگەیەنین كه‌ دەزگا ئەمنییەکانی هەرێم دەستیان بە لێکۆڵینەوە کردووە.

هه‌روه‌ها داوا لە هاووڵاتیانی بەڕێزی شاری هەولێر و تێکڕای هەرێمی کوردستان دەکەین، وەک هەمیشە لە ئاستی بەرپرسیاریه‌تی و چاوکراوە بن و هه‌مووان دڵنیا دەکه‌ینەوە کە ده‌زگا ئه‌منییه‌كان هەموو هەوڵێک دەگرنە بەر بۆ پاراستنی ئاسایش وسەقامگیریی هەرێم، كاروانی‌ ئاوەدانی‌ و به‌ره‌وپێشچوونیش ناوەستێت و ئەم کردەوانە حكوومه‌ت و خه‌ڵكی‌ كوردستان ناترسێنن.

ئەنجومەنی وەزیرانی هەرێمی کوردستان
19ی نۆڤەمبەری 2014