سەرۆکی فراکسیۆنەکانی پەرلەمانی کوردستان لەگەڵ ئەنجومەنی هەرێم بۆ کاروباری نەوت‌و گاز کۆبوونەوەو هەر دوولا بڕیاریان لەسەر حەوت خاڵ دا، خاڵێكیان جەخت لە پاڵپشتی پەرلەمان بۆ حکومەت دەکەنەوە.
ئەمڕۆ یه‌كشه‌ممه ١-٣-٢٠١٥ سەرۆکایەتی پەرلەمان‌و سەرۆكی فراكسیۆنەكان و هەر دوو لیژنەی وزە و سامانە سروشتییەكان و لیژنەی دارایی و ئابووری و وەبەرهێنان لە پەرلەمانی کوردستان، سەردانی ئەنجومەنی وەزیران دەکەن و لەگەڵ ئەنجومەنی هەرێمی بۆ کاروباری نەوت و گاز بە سەرۆکایەتیی سەرۆکی حکوومەتی هەرێمی کوردستان و جێگری سەرۆکی حکوومەتی هەرێمی کوردستان و وەزیرانی سامانە سروشتییەکان و دارایی و پلاندانان کۆدەبنەوە.
كۆبوونەوەكە لەسەر داوای ئەنجوومەنی وەزیران بۆ تاوتوێكردنی قەیرانی دارایی و كێشەكانی نێوان هەرێمی كوردستان و بەغدا و دوایین پێشهاتەكان.
لەو کۆبوونەوەیەدا هەر دوولا گەیشتنە ئەم حەوت خاڵەو بڕیاریان لەسەر درا:
1-هەوڵەكانی هەرێم لەگەڵ حكوومەتی فیدراڵی عێراق بەردەوام بێت و پێویستە بەشە بودجەی هەرێمی كوردستان خەرج بکرێت بە گوێرەی یاسای بودجە، كە چۆتە بواری جێبەجێكردنه‌وه.
2- حكوومەتی هەرێمی كوردستان و پەرلەمانی كوردستان بەیەكەوە هەماهەنگ بن لە داڕشتنی پلان و ستراتیژ بۆ چارەسەركردنی قەیرانی دارایی و دابینكردنی بودجە و مووچەی هاووڵاتیان، بە گرتنەبەری سەرجەم ڕێکارە یاساییەکان.
3- درێژەدان و برەودان بە هەنگاوەکانی حکوومەتی هەرێمی کوردستان، بە جێبەجێكردنی كارنامەی کابینەی هەشتەم، بە دانانی نەخشەڕێگای چارەسەری بنەڕەتی بۆ چاكسازی بە گشتی و بە تایبەتی لە بواری كەرتی نەوت و گاز و داراییی گشتیدا.
4- دەستەبەركردنی زیاتر و برەودان بە هەنگاوەکانی هەرێم لە بواری شەفافیەت و كاراتربوونی چالاکییەکانی ئەو بوارە.
5- بۆ كارئاسانی و بەدەستهێنانی زانیاری و ئاگاداربوون لە كاری دامودەزگاكانی حكوومەتی هەرێمی كوردستان، هەردوولا بە پێویستیان زانی و هاوڕا بوون بە دامەزراندنی ژووری زانیاریی هاوبەش لە نێوان پەرلەمان و حكوومەتی هەرێمی كوردستاندا.
6- جەخت لە پاڵپشتیی پەرلەمانی كوردستان بۆ حكوومەتی هەرێمی كوردستان كرایەوە بۆ دۆزینەوەی ڕێگەچارەسەری گونجاو بۆ سەرجەم پرس و كێشە هەنووكەییەكانی هەرێمی كوردستان، لە چوارچێوەی یاسا بەرکارەکاندا.
7- وەزارەتی سامانە سروشتییەکان، هەفتانە لە ماڵپەری خۆیدا زانییارییەکان لەسەر ڕێژەی بەرهەمهێنان و نەوتی هەناردەکراو، ڕابگەینێت.