نوسینگەی حەیدەر عەبادی سەرۆکوەزیرانی عێراق لە راگەیەندراوێکدا، بەتووندی دژی دابەشبوونی عێراق دەوەستێتەوەو داواش لە وڵاتانی جیهان دەکات دەستوەرنەدەنە کاروباری نێوخۆی عێراق.

لە راگەیەنراوێكدا کە ئەمڕۆ سێشەممە 12-5-2015 نووسینگەی سەرۆکوەزیرانی عێراق بڵاویکردووەتەوە، لێدوانی ڤیکتۆر ئۆربان سەرۆکوەزیرانی هەنگاریا بۆ پاڵپشتیکردن لە سەربەخۆیی کوردستان رەتدەکاتەوەو دەڵێ "دەستوەردانێکی قبوڵنەکراوە لە کاروباری نێوخۆی عێراق".

هەروەها هاتووە "داوا لە هەموو وڵاتان دەکەین ، کە رێز لە سەروەریی عێراق و یەکێتیی خاکەکەی بگرن و دووربکەونەوە لە دەستوەردان لە کاروباری نێوخۆی". جەختیشکراوەتەوە کە حکومەتی ناوەند "سوورە لەسەر هەڵوێستە نەگۆڕەکەی و رەتکردنەوەی هەر پرۆژەیەک بۆ دابەشکردنی عێراق".

راگەیەنروەكەی عەبادی، دوای لێدوانی سەرۆکوەزیرانی هەنگاریا دێت، کە رۆژی دووشەممە 11-5-2015 لە کۆنگرەیەکی رۆژنامەوانی هاوبەشدا لەگەڵ مەسعود بارزانی وتی: "هەنگاریا پشتگیریی هەموو ئەو گەلانە دەکات کە هەوڵی سەربەخۆیی دەدەن و خەباتیان کردووە بۆ بەدەستهێنانی مافەکانیان، لەسەر ئەو بنەمایەش پشتگیریی هەرێمی کوردستان دەکەین"