دوو پەرلەمانتاری سوید کە لەبنچەدا کوردن لەسەر پرسی سەرۆکایەتی هەرێم ئاگادار دەکەنەوەو دەڵێن: بەداخەوە ڕووداوەکانی ئەم چەند حەفتەیەی دوایی، زەنگێکی زۆر ترسناکن و پرۆسەی دیموکراسی بە ئاراستەیەکی تردا دەبات.
لەو نامە کراوەیەدا هەردوو پەرلەماتار ئامینەی کاکە باوەو جەبار ئەمین دەڵێن: هەربۆیە زۆر ئاساییە، و بگرە پێویستە، کاتێک چەند پارتێکی نێو پەرلەمانی هەرێمی کوردستان کە نوێنەرایەتی نزیکەی لە سەدا شەستی دەنگدەران دەکەن داوادەکەن یاسای سەرۆکایەتی هەرێم هەمواربکرێتەوە و پرنسیپی دەستاو دەستکردنی دەسەڵات بچەسپێت. ڕوبەڕوبونەوەی داوایەکی دیموکراسی و ڕەوا مایەی مەترسییە.
ئەو دوو پەرلەمانتارەی سوید باس لەوە دەکەن لەم ساتەدا هەرێمی کوردستان لەبارێکی ئالۆز و لەبەردەم کۆمەڵێ مەترسی گەورەدایە: هێرشی دڕندانەی تیروریستانی داعش بۆ سەر گەلەکەمان، هاوڵاتیانی هەرێم خراونەتە ژێرباری قەیرانێکی ئابوری قورس ، گەندەڵی لە هەرێمدا گەیشتۆتە لوتکە، مافی ژنان پێشێل دەکرێت و یەکسانی و دادپەروەری کۆمەڵایەتی وەلا دەخرێت. ئالەم کاتەدا دەبووایە سەرۆکی هەرێمی کوردستان دەست پێشخەر و چالاک بوایە بۆ سازانی نیشتیمانی بە مەبەستی لە ناوبردنی هەموو ئەو مەترسی و کێشانەی کە ڕووبەڕووی پرۆسەی سیاسی بونەتەوە و هەنگاوی فعلی هەبوایە بۆ بەرەو کۆمەڵگایەکەی دیموکراسی، یەکسان و مەدەنی کە مافی تاک تێیدا پارێزراوبێت. کە چی لە باتی ئەو هەموو ململانیی سیاسیەکە لەسەر مانەوەی سەرۆکی هەرێمە لەسەر تەختی سەرۆکایەتی.
ئامینەی کاکە باوەو جەبار ئەمین داوا دەکەن لەم هەل و مەرجی ئێستادا گرنگە دەسەڵاتدارانی هەرێمی کوردستان پەرە بە پرۆسەی دیمۆکراسیەت بدەن نەک بەرتەسکی بکەنەوە. ئالەم بارە سیاسییە ناهەموارەدا، گرنگە هەرێمی کوردستان ببێتە پاڵپشتێک بۆ خەڵکی پارچەکانی تری کوردستان و خەباتەکەیان، نەک هاوکاری داگیرکەران بکەن. لە ڕۆژێکی وەک ئەمڕۆدا پێویستە دەسەڵاتی سیاسی لە هەرێمی کوردستان ڕووبەڕووی توندڕەوی ئیسلامی بێتەوە، نەک ڕێگایان پێبدات هێرش بکەنە سەر ژنان و پێشکەوتووخوازان.