هاوسەرۆكی نوێی كەنەكە هەڵبژێردرا
ئەمرۆ ١٥هەمین دانیشتنی کۆنگرەی نەتەوەیی کوردستان (کەنەکە) لە شاری
برۆکسلی پایتەختی بەلجیکا کۆتایی هات و هاوسەرۆكی نوێ هەڵبژێردرا.
دوێنێی شەممە هەڵبژاردن بۆ هاوسەرۆكی نوێی كەنەكە كراو هەریەك لە رێبوار رەشید و نیلۆفەر کۆچ وەک هاوسەرۆکی کەنەکە هەڵبژێردران.
بەپێی راگەیەنراوێكی دەستەی بەڕێوەبەری كۆنگرەكە، لەو دانیشتنەدا كە سێ رۆژی خایاند چەندین خاڵ لە لایەن بەشداربووانەوە پەسەند كرا كە ئەمانەن:
١- کۆنگرەی نەتەوەیی کوردستان (کەنەکە) بگەڕێتەوە کوردستان.
٢- لەدژی سیاسەتەکانی ئاک پارتی دژی کورد لە تورکیا رێپێوانێکی فراوانی جەماوەری رێکبخرێت.
٣- کار بکرێت بۆ ئازادکردنی عەبدوڵا ئۆجەلان، رێبەری زیندانیکراوی پەکەکە.
٤- ئەندامانی کەنەکەی هەر چوار پارچەی کوردستان لە یەک کۆمسیۆندا خۆیان ببیننەوە.
٥- پرۆژەیەکی دیموکراتیبوونی سیاسەتی باشووری کوردستان پێشکەش بکرێت.
٦- یەکێتیی ئێزدییەکان بەهێزتر بکرێت.
٧- مافی هەموو پێکهاتەکان لە کوردستان مسۆگەر بکرێت.
٨- ئازادیی ژن لە هەر چوار پارچەی کوردستان بەرەو پێش بچێت.
PM:05:11:27/09/2015