سەرۆكی فراكسیۆنی گۆران لە ئەنجومەنی نوێنەرانی عێراق لە بارەی سوكایەتی كردن بە ئاڵای كوردستان ڕایدەگەیەنێت، سوكایەتیكردن بە ئاڵای كوردستان بەشێكە لە پلانی تێكدانی نێوان پێهكاتەی كورد و شیعە، لەسەر كاربەدەستانی كەربەلا پێویستە رونكردنەوە بدەن و تاوانباران بدرێنە دادگا.

هۆشیار عەبدوڵا ؛سەرۆكی فراكسیۆنی گۆران لە ئەنجومەنی نوێنەرانی عێراق؛ لە لێدوانێكیی رۆژنامەوانیدا ڕایگەیاند، لەژێر پەرچەم و ئاڵای كوردستاندا هەزاران لاو و تاكی كورد گیانیان فیداكردوە و بۆ پارێزگاری لە شكۆی ئەو ئاڵایە بە گژ رژێمی دیكتاتۆریدا چۆتەوە و تا تاكێكی كوردیش مابێت داكۆكی لێدەكات.

دەشڵێت:"سوكایەتیكردن بە ئاڵای كوردستان لە پارێزگای كەربەلا، كە دانیشتوانەكەی لە مەزهەبی شیعەن لەگەڵ ئەومێژووە هاوبەش و دۆستایەتیە دێرینە یەكانگیر نابێتەوە، كە لەنێوان كورد و شیعەدا هەیە و پێویستە كاربەدەستانی ئەو پارێزگایە و هێز و لایەنە شیعیەكان سنورێك بۆ ئەو كارە هەمەجی و دور لە بەهایانە دابنێن.

ڕاشیگەیاندوە، ئەوانەی نوێنەرایەتی ئەم جۆرە عەقڵیەتە دەكەن، عێراق و پەیوەندی نێوان پێكهاتەكانیان گەیاندە ئەمرۆ و پێویستە  ڕێیان لیبگرێ و نەهێلێرێت ئاگری فیتنەی تایەفی و مەزهەبی زیاتر خۆش بكەن.

ئاماژەی بۆ ئەوەشكردوە، ئاڵای كوردستان ئاڵایەكی فەرمی هەرێمی كوردستانە و كە هەرێمێكی فەرمی و دەستوریە لە عێراقدا و هەر جۆرە سوكیەتیەك بەو ئاڵایە سوكایەتیە بە ئاڵای عێراق و دەستور و ئیرادەی خەڵكی كوردستان.

هۆشیار عەبدوڵا داواشیكردووە ، هەرگیز پەرچەكرداری هاوڵاتیانی كوردستان نابێ وەك ئەو خەڵكە نابەرپرسیارە بێت و دەبێت تاكی كورد وێنەیەكی جیاواز لە ڕۆشنبیری و رێز نیشانی هەموو دونیا و پێكهاتەكانی دیكەی عێراق بدات.

سەرۆكی فراكسیۆنی گۆڕان هۆشداریشیدا ئەگەر بە زوویی لەلایەن عاقڵەكانی شیعەوە سنورێك دانەنرێت ئەوا ئایندەیەكی تاریك و خراپ چاوەرێی عێراق و پەیوەندیەكانی نیوان كوردو شیعە دەكات.