لەكۆبوونەوەیەكدا لەگەڵ وەفدێكی ئەنجومەنی ناوەندیی یەكێتی، رێكخەری گشتی بزوتنەوەی گۆڕان سەبارەت بە رێكەوتنەكەیان جەختی لەسەر ئەوە كردەوە ئەو رێكەوتنە دژی هیچ حیزب‌و لایەنێك نیە.

بەپێی هەواڵی میدیاكانی یەكێتی، ئەمڕۆ 2016/6/30 وەفدێكی باڵای ئەنجومەنی ناوەندی یەكێتیی نیشتمانیی كوردستان كەپێكهاتبوون لە عادل موراد سكرتێری ئەنجومەنی ناوەندی و سكرتارییەتی ئەنجومەن و لێپرسراوی كۆمسیۆنەكانی ئەنجومەن سەردانی نەوشیروان مستەفا رێكخەری گشتی بزوتنەوەی گۆڕان یان كردو لەكۆبونەوەیەكدا دواین گۆڕانكاری و پێشهاتە سیاسییەكانی كوردستان و عیراق و ناوچەكەیان تاووتوێكرد.

سەرەتا رێكخەری گشتی بزوتنەوەی گۆران بەخێرهاتنی وەفدی ئەنجومەنی ناوەندی كردو پاشان عادل موراد ئامانجی سەردانەكەیان بۆ لای بەڕێزیان رونكردەوە، پاش هەوڵپرسین لە تەندروستی و هیوای لەش ساغیان بۆ خواست.

دواتر باس لەگرنكی رێككەوتنی یەكێتی و گۆران كراو ، عادل موراد بەناوی ئەنجومەنی ناوەندییەوە بەگرنگیەوە باسی جێبەجێكردنی رێككەوتنەكەی كردو كۆبونەوەی هاوبەشی هەردوولاو سەردانی وەفدە هاوبەشەكەی یەكێتی و گۆڕان بۆ لای حزب و لایەنە سیاسیەكانی كوردستان و كۆبونەوەی فراكسیۆنەكان لەپەرلەمانی كوردستان و ئەنجومەنی پارێزگاكان و سەردانی وەفدی هاوبەشی فراكسیۆنەكانی یەكێتی و گۆران بۆ بەغداو كۆبونەوەیان لەگەڵ سەرۆك و كەسی یەكەمی حزب و لایەنە سیاسیەكانی عێراق و باڵیۆزانی وڵاتان لەبەغدا بەگرنگ وەسف كرد، هەروەها تێگەیشتنی حزب و لایەنە سیاسیەكان و وڵاتان بۆ رێككەوتنەكە ئەرێنی بووەو پیشتیوانی خۆیان بۆ نزیكبونەوەو لێكتێگەیشتن لە نێوان پارت و لایەنە سیاسیەكانی كوردستان رەنگدانەوەی ئیجابی دەبێت بۆ كوردستان و عیراق و ناوچەكەش.

لەبەشێكیتری كۆبونەوەكەدا بارودۆخی سیاسی كوردستان و ئەو قەیرانانەی كە بەرۆكی هەرێمی كورستانی گرتووە گفتوگۆی لەبارەوە كرا ، بەتایبەتی قەیرانی دارایی كە كاریگەری سلبی لەسەر ژیان و گوزەرانی هاوڵاتیان كردوە .

لای خۆشیەوە نەوشیروان مستەفا رێكخەری گشتی بزوتنەوەی گۆران باسی گرنگی رێككەوتنەكەی كرد  وتی: بەم رێككەوتنە توانیمان كۆتایی بەناكۆكی دوو حزبی سیاسی سەرەكی كوردستان بهێنین و بۆ یەكڕیزی و تەبایی نێو ماڵی كورد زۆر گرنگە، ئەم رێكەوتنە دژی هیچ حزب و لایەنێك نیە و جێبەجێكردنی خاڵ و بڕگەكانی رێككەوتنەكە قازانجە بۆ هەموو میللەتی كورد.

وتیشی: یەكەم كۆبونەوەی سەركردیەتیە هاوبەشەكە زۆر باش بوو، ئەو لیژنانەی كە پێكهاتبون كارەكانیان ئەنجام دەدەن و پێویستە بەهەموو لایەكمانەوە هەوڵی ئەوە بدەین كە خاڵەكانی رێككەوتنەكە جێبەجێ بكەین، لەو روەشەوە نەوشیروان مستەفا ئەنجومەنی ناوەندی بەئۆرگانێكی گرنگی یەكێتی زانی و وتی:"هەر وەك چۆن  لەسەرەتاوە كارتان بۆ كردوە بەهەمان شێوە پشتیوانی ئەو رێككەوتنە بن.

لە كۆبونەوەكەدا هەردوولا جەخیتان لەپەلەكردن لە باشكردنی ژبان گوزرانی ناهەمواری هاووڵاتیان پشتبەستن بەخاڵ و بڕگەكانی رێككەوتنەكە كردەوە.

لە كۆبونەوەكەدا گفتوگۆ لەبارەی دواین گۆڕانكاریی و پێشهاتەكانی عیراق و ناوچەكە كرا.