سەرۆکی پەرلەمانی عێراق رۆڵی پێشمەرگە بەرزدەنرخێنێت و، هاوکات داواش دەکات خۆپیشاندان دژی پەرلەمانتاری عێراق سروە عەبدولواحید راگرن.
لە بەیاننامەیەکدا د. سەلیم جەبوری سەرۆکی پەرلەمانی عێراق رایگەیاند " سەرجەم پەرلەمانتارانی کورد لەژێر چەتری ئەنجومەنی نوێنەراندا ڕۆڵی گرنگیان ھەبوە لەدۆسیە عیراقییەکان و بەرژەوەندییەکانی ھاوڵاتیانی ھەرێمی کوردستان".
هەروەها لە بەیاننامەکەدا ئاماژە بۆ رۆڵی سروە عەبدولواحید دەکات و، تیایدا هاتووە " یەکێک لەو پەرلەمانتارانەش کە بەردەوام ڕۆڵی ھەبوە، سروە عەبدولواحید پەرلەمانتاری گۆڕانە، بۆیە پێویستە ئەو خۆپیشاندان و ناڕەزاییەی لەدژی ئەو دروستکراوە کۆتایی بێت”.
سەرۆکی ئەنجومەنی نوێنەرانی عیراق ڕۆڵی ھێزی پێشمەرگەش لەڕوبەڕوبونەوەی چەکدارانی داعش بەگشتیی و شەڕی ڕزگارکردنەوەی موسڵ بەتایبەتی بەگرنگ و مێژویی وەسفدەکات" لەتەواوی ڕوبەڕوبونەوەکانی تیرۆریستانی داعش، ئەو ھێزە ڕۆڵی گرنگ و مێژویی ھەبوەو بەتایبەتیش لەشەڕی ڕزگارکردنەوەی شاری موسڵدا، پێشمەرگە توانیویەتی زیانێکی زۆر بەداعش بگەیەنێت و پانتاییەکی گەورە ڕزگاربکاتەوە”.
لەکۆتایی بەیاننامەکەشیدا جبوری باسی لەوەکردوە، بەردەوامبونی گرژیی و ئاڵۆزیی و ناکۆکیەکان ھیچ سودێکی بۆ یەکڕیزیی و پێکەوەژیان نابێت کەعیراق پێویستی پێیەتی بۆئەوەی وەک چەکێک لەدژی تیرۆریستان بەکاریبھێنێت.