ئەنجومەنی وەزیران بڕیاردەدات لە دەستکاری کردنی مووچەی فەرمانبەران وچەند پێشنیازێکیش خراوەتە ڕوو.

یوسف عوسمان عەوێنەیی، سەرۆكی یەكێتی فەرمانبەرانی كوردستان ڕایگەیاند، لە ئەنجومەنی وەزیرانەوە چەند زانیارییەكی پێگەیشتووە و تێدا باس لە گەڕانەوەی پارەی پاشەكەوتكراوی فەرمانبەران دەكات.

ناوبراو بە ڕۆژنامەی باسی وتووە "یەكێك لە پێشنیازەكان 10% تاوەكو 15% ڕێژەی پاشەكەوتی مووچەی فەرمانبەران هەڵبگیرێت بۆئەوەی بڕێك لە موچەی فەرمانبەران زیاتر بكرێت و مووچە لەسەر بنەمای مووچەی بنەڕەتی بدرێت و دەرماڵەكان هەڵبگیرێن".

یوسف عوسمان عەوێنەیی، سەرۆكی یەكێتی فەرمانبەرانی كوردستان ڕاشیگەیاندووە "ئەگەر تەنها مووچەی بنەڕەتی بدرێت بە فەرمانبەران بەشی زۆری فەرمانبەران سودمەند دەبن و حكومەتیش قازانجێتی، بەشێك لە فەرمانبەران مووچەكانیان زیاتر دەبێت و قەرزەكانی سەر حكومەتیش كەمتر دەبنەوە و بەوەش نزیكەی 150 ملیار دینار بۆ حكومەت مانگانە دەگەڕێتەوە".