نوسینگەی کۆسرەت ڕەسوڵ ڕاگەیەندراوێک بڵاودەکاتەوە


نوسینگه‌ی‌ كۆسره‌ت ڕه‌سول عه‌لی‌، جێگری‌ یەکەمی سكرتێری‌ گشتی‌ یه‌كێتی‌ نیشتیمانی‌ كوردستان بڵاویكرده‌وه‌ كه‌ سه‌رله‌به‌یانی‌ ئه‌مڕۆ14-9-2017 كۆسره‌ت ره‌سول عه‌لی‌ له‌شاری‌ كه‌ركوك له‌گه‌ڵ لێپرسراوی‌ كۆمیته‌ و كادیر و ئه‌ندامانی‌ یه‌كێتی‌ نیشتمانی‌ كوردستان كۆبووەتەوە

 


لە راگه‌یەندراوه‌کەدا هاتووە "دیدو بۆچوونی‌ وردی‌ یه‌كێتی‌ نیشتمانی‌ كوردستانیان له‌سه‌ر كۆی پرسه‌كان خسته‌ڕوو و جه‌ختیان له‌وه‌ كرده‌وه‌ كه‌ به‌درێژایی مێژوو یه‌كێتی‌ نیشتمانی‌ كوردستان داكۆكیكاری‌ سه‌رسه‌ختی‌ كه‌ركوك بووه‌".

هه‌روه‌ها ئاماژه‌ی‌ بۆ كراوه‌ كه‌ كۆسره‌ت ره‌سول عه‌لی‌ تیشكی‌ خسته‌سه‌ر رۆڵ و پێگه‌ی‌ كه‌ركوك و كه‌ركوكییه‌كان له‌ شۆڕشه‌ یه‌ك له‌دوای‌ یه‌كه‌كانی‌ كورد به‌گشتی‌ و شۆڕشی نوێ به‌تایبه‌تی‌ و وتویه‌تی‌ "هه‌میشه‌ كه‌ركووك هه‌ستیارترین شوێن بووه‌ و ئه‌مڕۆش بارودۆخی‌ كه‌ركووك به‌ قۆناغێكی‌ یه‌كجار هه‌ستیار تێپه‌ڕده‌بێ".

له‌كۆبونه‌وه‌كه‌دا هه‌ریه‌ك له‌ "د. نه‌جمه‌دین كه‌ریم، ئاسۆ مامه‌ند، سه‌عدی‌ پیره‌، ره‌فعه‌ت عه‌بدوڵا" ئه‌ندامانی‌ مه‌كته‌بی سیاسی و خالید شوانی‌ ئه‌ندامی‌ سه‌ركردایه‌تی‌ و لاهور شێخ جه‌نگی‌ لێپرسراوی‌ ئاژانسی پاراستن و زانیاری‌ - زانیاری‌ و ده‌رباز كۆسره‌ت ره‌سول وه‌زیری ئاوه‌دانكردنه‌وه‌و نیشته‌جێكردن ئاماده‌ی بوون.

به‌پێی‌ ڕاگه‌یاندراوه‌كه‌ له‌به‌شێكی‌ تری‌ وته‌كانیدا جێگری یه‌كه‌می‌ سكرتێری گشتی‌  وتوویه‌تی‌ "مافێكی‌ ره‌وای‌ گه‌لی‌ كورده‌ كه‌ له‌رێگه‌ی‌ ئه‌نجامدانی‌ ریفراندۆم چاره‌نووس و ئاینده‌ی‌ خۆی دیاربكات و هه‌موو كورد چاوه‌ڕێی هیممه‌تی‌ گه‌وره‌یه‌ له‌ كه‌ركوكییه‌ قاره‌مانه‌كان".

ئه‌م ڕاگه‌یاندراوه‌ی‌ نوسینگه‌ی‌ كۆسره‌ت ره‌سول عه‌لی‌ له‌كاتێكدایه‌ کە سەرچاوەیەکی باڵا لەناو کۆبوونەوەکە بە "سپی میدیا"ی ڕاگەیاند له‌كۆبونه‌وه‌كه‌دا كادران و ئه‌ندامانی‌ مه‌ڵبه‌ندی‌ كه‌ركوك و زۆرینەی بەرپرسانی یەکێتی یه‌كێتی‌ نیشتیمانی‌ ریفراندۆمیان له‌ئێستادا به‌تایبه‌تی‌ بۆ شاری‌ كه‌ركوك ره‌تكردۆته‌وه‌.

هەروەها سەرچاوەکەی "سپی" ئەوەشی ئاشکراکرد کۆسرەت ڕەسوڵ بە نیگەرانیەوە کۆبوونەوەکەی جێهێشتوە.


لێرەوە زانیاری زیاتر لەسەر کۆبونەوەکە بزانە



ئه‌م بابه‌ته ‌4285 جار خوێنراوه‌ته‌وه‌‌

PM:07:48:14/09/2017