سەرۆکی فراکسیۆنی پارتی لە پەرلەمانی کوردستان دەڵێ، نامەکەی بارزانی بۆ دەستلەکارکێشانەوە نییەو، سەرۆکی پەرلەمانیش بۆ یەک خولەکیش مومارەسەی دەسەڵاتەکانی سەرۆکی هەرێم ناکات.

لەبارەی ئەجێندای کۆبوونەوەی رۆژی یەکشەممە 29-10-2017 ی پەرلەمانی کوردستان، ئومێد خۆشناو، سەرۆکی فراکسیۆنی پارتی بە رووداوی رایگەیاند: "سبەی دوای ئەوەی نامەکەی جەنابی سەرۆک بارزانی دەخوێندرێتەوە، گفتوگۆ لەسەر پرۆژەیاسایەک دەکرێت بەناوی دابەشکردنی دەسەڵاتەکانی سەرۆکایەتیی هەرێمی کوردستان بەسەر دەزگا و دامەزراوەکانی دیکەی هەرێمی کوردستان، کە بریتین لە پەرلەمان و حکومەت و ئەنجوومەنی دادوەری".

سەبارەت بە نێوەڕۆکی نامەکەی بارزانی کە دەگوترێت نامەی دەستلەکارکێشانەوەیە، ئومێد خۆشناو گوتی: "بەهیچ شێوەیەک ئەو نامەیەی جەنابی سەرۆک پێشکەشی کردووە دەستلەکارکێشانەوە نییە، بەڵکو جەنابی سەرۆک مەبەستیەتی چیدیکە باس لەوە نەکرێت ماوەی سەرۆکایەتیی هەرێمی کوردستان درێژبکرێتەوە".

سەرۆکی فراکسیۆنی پارتی لە پەرلەمانی کوردستان گوتیشی: "جەنابی سەرۆک خوازیاری ئەوەیە ماوەی سەرۆکایەتییەکەی درێژنەکرێتەوە، لەو دوو وەرزەی کە پەرلەمان ماویەتی ئامادەکاری بۆ ئەوە بکرێت لەکاتی خۆیدا هەڵبژاردن بۆ سەرۆکی هەرێمی کوردستان و پەرلەمانی کوردستان ئەنجامبدرێت". بڕیارە 8 مانگی دیکە، واتە 1-7-2018 هەردوو هەڵبژاردنەکە پێکەوە ئەنجامبدرێن.

سەبارەت بەو لایەنانەی دەتوانن دەسەڵاتەکانی سەرۆکی هەرێمی کوردستان بەکاربهێنن، ئومێد خۆشناو گوتی: "بەپێی پرۆژەیاساکە پەرلەمانی کوردستان مومارەسەی دەسەڵاتە یاساییەکان،  حکومەت مومارەسەی دەسەڵاتە تەنفیزییەکان و ئەنجوومەنی دادوەریش مومارەسەی  دەسەڵاتە دادوەرییەکان دەکات".

سەبارەت بە مومارەسەکردنی دەسەڵاتەکانی سەرۆکی هەرێمی کوردستان لەلایەن سەرۆکی پەرلەمانەوە، ئومێد خۆشناو گوتی: "بەپێی ئەو بابەتەی سبەی لە پەرلەمان گفتوگۆی لەسەر دەکرێت و پرۆژەیاسایەک پێشکەش دەکرێت و گفتوگۆی لەسەر دەکرێت و دواجار دەنگی لەسەر دەدرێت، یەک دەقەش سەرۆکی پەرلەمان مومارەسەی دەسەڵاتەکانی سەرۆکی هەرێم ناکات".