قوباد تاڵەبانی پەیامێك لەبارەی دۆخی ناوخۆی یەكێتی و بەستنی كۆنگرەی حزبەكە بڵاودەكاتەوەو رایدەگەیەنێت "دەبێت كۆنگرەیەك بێت لە پێناوی پیداچوونەوەیەكی سەرتارسەری بە هەیكەلیەت و شێوازی كاركردن و بڕیاردان و پەیڕەو و كارنامەی حیزبەكەمان".
هەروەها دەڵێت "تاكە هەنگاو كە یەكێتیەكەمان دەخاتە سەر ڕێچكەیەكی دروست و تەندروست، بەستنی كۆنگرەیەكی ئاساییە".
دەقی پەیامەكە:
یەكێتییە دڵسۆز و دڵگران و خەمخۆرەكان..
كەسو كاری سەربەرزی شەهیدان و ئەنفالكراوان و زیانلێكەوتوانی كیمیابارانكردن، ئەندامانی پێشمەرگەو رێكخستنە دێرینەكانی یەكێتیی
كەم ئەندامی سەنگەر و زیندانە سیاسییەكانی یەكێتیی
كادر و ئەندام و لایەنگران و قەڵەم بەدەست و ڕاگەیاندنكاران و دڵسۆزانی ڕێبازە پیرۆزەكەی هەڤاڵ مام جەلال..
هەڤاڵانی ئازیز..
سڵاوێكی مام جەلالانەتان لێبێت..
شاراوە نیە كە ئەمڕۆ یەكێتیەكەمان لە دۆخێكی سەخت و دژوارو نالەباردایە، رووبەرووی هەڕەشەو مەترسی گەورەی دەرەكی و نێوخۆی و نێوخودیش بوینەتەوە. لەبەردەم خواست و نیگەرانی زۆرینەی كادر و ئەندام و لایەنگرانداین. بەلێ، ئێستا رووبەروی گلەیی زۆری كۆمەڵانی خەڵكی كوردستان بە گشتی و ناوچە دابڕاوەكان بەتایبەت، بووینەتەوە.
لە غیابی هەڤاڵی دڵسۆزتان و رابەری گەورەمان هەڤاڵ مام جەلال، یەكێتیی تووشی نەخۆشی چاوەڕوانكراودا بوو. لە غیابی مام، كوردستان و عێراق دووچاری كێشەو شەڕ و مەترسی گەورە بووە، مەترسییەكی وا گەورە كە بە بێ یەكێتیەكی یەكریز و یەكدەنگ و بەهێز، لەوانەیە كوردستان بەرگەی نەگرێت، چونكە لەهەموو سەردەمانێك یەكێتیی ناو ڕیزەكانی یەكێتیی نیشتیمانی كوردستان بۆتە ڕێچكەی یەكێتیی ڕیزەكانی گەلەكەمان، هەمیشە یەكێتیی بۆتە باڵانسی هێزی دیموكراسی و ئاشتەوایی بۆ گەلەكەمان.
بۆ ئەوەی یەكێتیی بتوانێت رۆڵی خۆی ببینێت لە بەرەنگاربوونەوەی ئەم هەموو هەڕەشە دەرەكی و نێوخۆییانەدا و خەبات بكات لە پێناوی پاراستنی یەكپارچەیی كوردستان و دەربازكردنی لەم هەلومەرجە نەخوازراوەدا، كاتی هاتووە یەكێتیی دڵسۆزانە هەڵسەنگاندن بۆ خۆی بكات، بەخۆیدا بچێتەوەو دەست بخاتە سەر برینەكانی و چارەسەری بۆ بدۆزێتەوە، دان بە هەڵەكانیدا بنێت و خۆی ئامادە بكات بۆ قۆناغی نوێی خەباتی سیاسی لە كوردستان و عێراق و ناوچەكەمان.
دڵسۆزانی یەكێتیی لەم كاتە هەستیارەدا چەندین پێشنیاز و داواكاریان پێشكەش كردوە بۆ چۆنیەتی بەرێوەبردنی حیزبەكەیان، بەڵام بەشێكی زۆری ئەم پێشنیازانە پەردەپۆشكردنە لەو كێشە جەوهەریانەی كە لە ناوەوە یەكێتیەكەمانی پوكاندۆتەوە، بە ئاڵوگۆركردنی چەند دەموچاوێك، بەمشێوەیە لەم كات وساتەدا هیچ لە هیچ ناگۆڕێت، نە بەم هەنگاوە متمانەی كادیران و ئەندامان و تێكۆشەرەكانمان دەگەڕێنینەوە، نە یەكێتیە بریندارەكەمان باشتر ئامادە دەكەین بۆ هەڵبژاردنەكانی داهاتوو.
تاكە هەنگاو كە یەكێتیەكەمان دەخاتە سەر ڕێچكەیەكی دروست و تەندروست، بەستنی كۆنگرەیەكی ئاساییە. كۆنگرەیەك كە وەك دروشمەكەی مام "یەكێتیی ناو ڕیزەكانی یەكێتیی" بپارێزێت، نەك تەنها لە پێناو گۆڕینی دەموچاوی ئەم ٥٠ ئەندامی ئەنجومەنی سەركردایەتیە بەرێزەی ئێستا بە ٥٠ دەموچاوی نوێ، نەخێر، دەبێت كۆنگرەیەك بێت لە پێناوی پیداچوونەوەیەكی سەرتارسەری بە هەیكەلیەت و شێوازی كاركردن و بڕیاردان و پەیڕەو و كارنامەی حیزبەكەمان، ئینجا ببێتە هۆكارێك بۆ دەرفەتدان بە كادر و ئەندامە دڵسۆز و پسپۆڕ و سەردەمیەكانی حیزبەكەمان تا بێنە پێشەوە وشانبەشانی تێكۆشەرەكان ڕۆڵیان هەبێت لە هەڵسانەوەی یەكێتیی نیشتیمانیی كوردستان.
هەڤاڵانی تێكۆشەر و پابەند بووان بە ڕێبازەكەی مام..
كۆنگرەیەكمان ناوێت بۆ تۆڵەسەندننەوەو یەكتر سڕینەوە، كۆنگرەیەكمان دەوێت كە دەرئەنجامەكانی ببنە هۆكاری بەهێز بوونی یەكیەتیەكەمان، ئەمەش زەمینەسازی دەوێت. ئەوەی كە دەیەوێت بە شپرزەیی و بە نیەتی كودەتا بمانباتە ناو كۆنگرە، ئەوە لە ڕاستیدا دەیەوێت بە لێكترازان و شپرزەی لێی دەرچین و كۆنگرەش بكەنە مەیدانی ململانێی كەسیەتی و مینبەرێك بۆ بەرژەوەندیە تایبەتەكانیان.
لەم كۆنگرەیە دەبێت لە خۆمان بپرسینەوە، یەكێتیی بۆچی؟ روونی بكەینەوە كە بۆ یەكێتین؟ تەنها لەبەر رابردووەكەی؟ یان لەبەر روئیاكەی بۆ ئایەندە؟ كاتی هاتووە ڕێز لە رابردووە پڕ سەروەری و قارەمانیەتی یەكێتییەكەمان بگرین وهاوكاتیش خەبات بكەین بۆ دووبارە ناساندنەوەی یەكێتیی بە كۆمەڵانی خەڵكی كوردستان، بە پاباندبوون بە پرینسیپە نەتەوایەتیەكان كە یەكێتیی لە پێناویدا دروست بوو، بە هاوتەریب لەگەڵ پێشكەشكردنی روئیایەك بۆ رووبەرووبوونەوەی تەحەداو مەترسیەكانی ئەمڕۆی گەلەكەمان.
با چیتر یەكتر نەشكێنین، واز لەتۆمەتی بێ بنەما بهێنین، چیتر درۆ لەگەڵ یەكتریش نەكەین، سەرنجی كامێراكان ڕانەكێشین و وێنەی چەواشەكاری لەگەڵ یەكتردا بگرین تا وا لە كادیرەكانمانی بگەیەنین كە كێشەمان نیە و هەمووشتێك ئاساییە، ئەندام و كادیرەكانمان زۆر لەوە وریاترن، ئەوە ئەوانن قۆناغ بە قۆناغ دەرفەتی زیاتریان بە سەركردایەتییەكەیان داوە بۆ چارەسەركردنی نەخۆشییەكانی ناو یەكێتیی، ئەندام و كادیر ولایەنگری یەكێتیی نیشتمانی كوردستان، ئەوانەن كە لە هەڵبژاردنەكان كەموكورتیەكانی حیزبەكەمان پەردەپۆش دەكەن و ماڵ بە ماڵ، گەڕەك بە گەڕەك، ناحیە بە ناحیە و قەزا بە قەزا و پارێزگا بە پارێزگا دەگەڕێن و دەنگ بۆ یەكێتیی كۆ دەكەنەوە. سنگیان دەدەنە بەر گولەی دوژمنەكانی گەلەكەمان، جنێو و قسە نەشیاوەكانی سۆشیال میدیایان پێ دەوترێت، هەمووشی لە پێناو یەكێتیی نیشتیمانیی كوردستانە.
بۆیە لێرەوە، وەك هەڤاڵێكی دڵسۆزتان، وەك یەكێتیەكی بەوەفا، وەك پارێزەرێك لە رێبازە پیرۆزەكەی باوكم، داوا لە سەرجەم ئۆرگان و دام و دەزگاكانی یەكێتیی نیشتمانیی كوردستان دەكەم، نەك لەبەر ئەم سەركردە یان ئەو سەركردە، نەك لەبەر ئەم باڵ، یان ئەو باڵ، یان هیچ ماڵێك، بەڵكو لەبەر خاتری ئەو كادیر و ئەندام و تێكۆشەرانەی یەكێتیی، بە فەرمی و بە دەنگی دلێرەوە، داوای بەستنی كۆنگرەیەكی ئاسایی بكەین، فشار بكەین كە ئەم كۆنگرەیە تاوەكو كۆتایی مانگی یەك (كانونی یەكەم) ببەسترێت، داوا بكەن چیتر بە ناو و هەوڵی جیا جیا‌وە رێگری لە نوێكردنەوەی حیزبەكەمان و پەیمان و روئیای حیزبەكەمان نەگیرێت، با داوای بەستنی كۆنگرەی ئاسایی بكەین تاكو بە دەنگێكی زوڵاڵ بۆ كۆمەڵانی خەڵكی كوردستانی ئاشكرا بكەین، كە "یەكێتیی بۆ ئاشتی و دیمۆكراسی و مافی مرۆڤ و مافی چارەی خۆنووسین و دادپەروەری وگەشەپێدانی كۆمەڵایەتی و بۆ درێژەپێدانی رێبازەكەی هەڤاڵ مام جەلال لە خزمەتتاندا دەبێت".
بە وتەیەكی هەڤاڵ مام جەلال كۆتایی بەم نوسراوەم دەهێنم، كە فەرموی " پێمخۆشە شتێكی كەش بڵێم، ڕوم بكەمە ئەندام و كادیرەكانی یەكێتیی نیشتمانی كوردستان، كە بەو جۆش و خرۆشەی ئێستەوە هەڵمەت بەرن بەرەو كۆنگرێسی داهاتوی یەكێتیی نیشتمانی كوردستان بەو جۆش و خرۆشەوە خەبات بكەن بۆئەوەی كۆنگرێسی داهاتوی یەكێتیی نیشتمانی كوردستان كۆنگرێسی پتەوكردن و چەسپاندنی یەكێتیی ناو یەكێتیی بێت، هەڵبژاردنی سەركردایەتی شایستەی یەكێتیی بێت و خوێنێكی نوێ بكرێتە لەشی یەكێتیەوە و ئەمجارە ژنان، گەنجان سەربخرێن بەرەو سەركردایەتی".
بەرەو رۆژێكی نوێ و ئایەندەیەكی گەش، بەرەو رووناكی یەكێتیی.
دروود بۆ گیانی پاكی هەڤاڵ مام جەلال و شەهیدە نەمرەكان.
هەر شاد و سەربەرز و سەركەوتوو بن
دڵسۆزتان
قوبادی مام جەلال تاڵەبانی