لە ئێران خۆپیشاندان بەردەوامە
چەندان شار و جێگای گرنگ کەوتۆتە دەست خۆپیشاندەران

بۆ رۆژی شەشەم خۆپیشاندان لە زۆرێک لەشارەکانی ئێران بەردەوامەو چەندان شوێنی لەلایەن خۆپیشاندەرانەوە کۆنترۆڵکراوەو چەندان شوێنی تر پێکدادان و خۆپیشاندانی توند لەنێوان خۆپیشاندەران‌و هێزە ئەمنییەکاندا بەردەوامە.

میدیای فەرمی ئێران بلآویکردەوە کە لە پێکدادانی خۆپیشاندانی رۆژانی رابردوودا ٢٢ کەس کوژراون، لەو ژمارە کوژراوانە ٩ یان شەوی رابردوو کوژراون و زۆربەیان لەشاری ئەسفەهانن.

لەلایەکی ترەوە میدیاکانی ئۆپۆزسیۆن چەندان چالاکی جۆراو جۆری خۆپیشاندانیان بلآوکردەوە: 

تاران:
لە مەیدانی " ئینقلاب"، پشێویەکی تەواو باڵی بەسەر بارودۆخەکەدا کێشاوەو پۆلیس و هێزە ئەمنیەکان ناتوانن کۆنترۆڵی بارودۆخەکە بکەن، هەروەها بانکی " سادرات " سووتێنراوە.

لە شاری ئاراک: 
شاری ئاراک یەکێکە لەو شارانەی دەکەوێتە ناوەڕاستی ئێران، لەو شارەدا بینای پارێزگاو بینای ئێستگەو تەلەفزیۆن کەوتوونەتە دەست خۆپیشاندەران، هەروەها خۆپیشاندەران دەستیان بەسەر بەندیخانەی شارەکەدا گرتووە.

کەرەج: 
شاری کەرەج کەدەکەوێتە رۆژئاوای تاران، خۆپیشاندەران سەرجەم بەنزینخانەو کۆگاکانی سوتەمەنیان سووتان، وەک ئەو میدیانە باسی دەکەن بۆیە ئەو کۆگای سووتەمەنیانەیان سووتاندووە لەبەرئەوەی ئۆتۆمبیلەکانی پۆلیس و هێزە ئەمنییەکان لە کۆگایانە سووتەمەنیان وەردەگرت.

کاشان: 
لە شاری کاشان بینای دادگا لەلایەن خۆپیشاندەرانەوە سوتێنرا.

ئەهواز:
شاری ئەهواز پێکدادانی توند لەنێوان خۆپیشاندەران و هێزە ئەمنییەکاندا بەردەوامە، خۆپیشاندەران دەستیان بەسەر چەندان زرێپۆشدا گرتووە، شەڕی گەڕەکەو گەڕەک لە شارەکە درێژەی هەیە.

مەلایر:
مەلایر دەکەوێتە باکوری رۆژئاوای تارانەوە، لەلایەن خۆپیشادەرانەوە بینای شارەوانی کۆنترۆلکراوەو پەنجەرەو دارو پەردووی بیناکە تێکشکێنراوە.

* لەشارەکانی قوم و ئەسەفەهان و کرماشان و بەندەر عەباس و چەندان شاری تر خۆپیشاندانی گەورەو بەرفراوان بەردەوامە و پێکدادانی توند لەنێوان خۆپیشاندەران و هێزە ئەمنییەکان درێژەی هەیە.  






ئه‌م بابه‌ته 3348 جار خوێنراوه‌ته‌وه‌‌

PM:12:36:02/01/2018