لەبارەی چاكسازی لە موچەی خانەنشینی پێشمەرگە دێرینەكانەوە یاداشتێك ئاڕاستەی پەرلەمانی كوردستان دەكرێت كە چەند داواكاریەكی لەخۆگرتووە.
لە یاداشتەكەدا كە وێنەیەكی بۆ "سپی میدی" نێردراوە هاتووە " ئێمە وەك پێشمەرگە دێرینەكان بە یاسای ژمارە (۳٨) ی ساڵی ۲۰۰۷ ی پەرلەمانی كوردستان خانەنشین كراوین، بەو مەرجەی هەر پێشمەرگەیەك(۳)ساڵ خزمەتی پێشمەرگایەتی هەبێت و بێ دابڕان لە ڕیزی بزوتنەوەی ڕزگاری خوازی نیشتمانیدا و خیانەتی نیشتمانی نەكردبێ شایستەی خانەنشین كردنە" و داوا دەكەن پەرلەمانتاران ڕەچاوی ئەو یاسایەی لای سەرەوە بكەن و دەستكاری بڕگەكانی نەكرێ".
دەقی یاداشتەكە:
بەڕێز/ جێگری سەرۆكی پەرلەمان
بەڕێزان/ ئەندامانی پەرلەمانی كوردستان
سڵاوێكی گەرم
ئاگادارین كە بەڕێزتان ماوەی دوو مانگ زیاترە سەرقاڵێ چاكسازین لە یاسای خانەنشینان . كە جێگەی خۆشحاڵیە
ئێمە وەك پێشمەرگە دێرینەكان بە یاسای ژمارە (۳٨) ی ساڵی ۲۰۰۷ ی پەرلەمانی كوردستان خانەنشین كراوین، بەو مەرجەی هەر پێشمەرگەیەك( ۳)ساڵ خزمەتی پێشمەرگایەتی هەبێت و بێ دابڕان لە ڕیزی بزوتنەوەی ڕزگاری خوازی نیشتمانیدا و خیانەتی نیشتمانی نەكردبێ شایستەی خانەنشین كردنە .
داواكارین لە بەڕێزتان
۱ــــ ڕەچاوی ئەو یاسایەی لای سەرەوە بكەن و دەستكاری بڕگەكانی نەكرێ .چونكە پێشمەرگەی دێرین زۆر ناحەقی بەرامبەر كراوەو خەڵكانێكی زۆر بە ناوی پێشمەرگەی دێرینەوە خانەنشین كراون .
۲ــــ ئێمە وەك پێشمەرگە دێرینەكان لە ساڵی ۲۰۱٥ وە چەندین جار سەردانی بەڕێز سەرۆكی پێشوی هەرێمی كوردستان و سەرۆكایەتی ئەنجومەنی وزیران و وەزیری پێشمەرگەمان كردوە وكۆبونەوەمان ئەنجامداوە بە مەبەستی چاكسازی و جیاكردنەوەی لیستی پێشمەرگەی دێرین . وا ئەو ئەركە بە بەڕێزتان سپێردراوە .
۳ــــ بە پێی جاڕنامەی مافەكانی مرۆڤ هەر مڕۆڤێك ئازادە لە هەڵبژاردنی شوێنی ژیان نیشتەجێ بونی . بۆیە داواكارین بەهیچ شێوەیەك دەستكاری مووچەی ئەوپێشمەرگە دێرینانە نەكرێت كە لە هەندەران ئەژین .
لەگەڵ ڕێزمان
حەمە ڕەشید قەرەداغی
جێگری سەرۆكی پێشمەرگە دێرینەكانی كوردستان