نەوەی نوێ لە بەیانێکی نوێیدا داوای بەردەوامیدان بە خۆپیشاندانی مامۆستایان و فەرمانبەران دەکات.
جوڵانەوەی نەوەی نوێ لە ڕاگەیەندراوێکدا بڵاویکردەوە "داوا لە سەرجەم هاوڵاتیان و موچەخۆران و سەرجەم چین و توێژەکان دەکەین بەردەوامی بە خۆپیشاندانی ئاشتیانە بدەن".
نەوەی نوێ ئاماژەی بەوە کردووە " داوا دەکەن لە سەبەینێوە بەشێوەی فراوانتر لە سەرجەم پارێزگاکانی هەڵەبجە و سلێمانی و هەولێر و دهۆک بەردەوامی بە خۆپیشاندانی ئاشتیانە بدەن".
جوڵانەوەی نەوەی نوێ ڕاشیگەیاندووە، "ئەم دەسەڵاتدارانە رێگە نادەن بەشە بودجەی هەرێم لە بەغداوە بگاتە دەست موچە خۆران، بۆیە کاتی ئارامگرتن و بێدەنگی نەماوە".
ئەوەشی خستووەتەڕوو "ئەم هێزە دەسەڵاتدارانە ئامادەن لە پێناو مانەوەی خۆیان هەرچی تەنازولە بۆ بەغدا و وڵاتانی ناوچەکە بکەن، دەسەڵات لە ئاستی مافی فەرمانبەران چەندین ڕێگە دەدۆزێتەوە بۆ بەردەوامی دان بە تاڵانکاری و چەتەیی و بردنی سەروەتی ئەم وڵاتە."