بەرهەم ساڵح، سەرۆكی لیستی هاوپەیمانی بۆ دیموكراسی و دادپەروەری رەخنەی توند لە دەسەڵاتدارانی هەرێم دەگرێت و دەڵێت، نابێت رێگە بدەین مووچە و قووتی هاوڵاتی ببێتە قوربانی ناكۆكییەكانی هەرێم و حكوومەتی عێراق و كۆمەڵێك قاچاخچی ململانێیەكانییان لەكەركوك و لەسەر حسابی خەڵكی كەركوك یەكلایی بكەنەوە، هاوکات لە ئەگەری سەرکەوتنیدا چەندین بەڵێنی جێبەجێکردنی چەندین پرۆژە بە لایەنگرانی دەدات.
ئەمڕۆ یەکشەممە لە یەکەم رۆژی دەسپێکی هەڵمەتی بانگەشە بۆ هەڵبژاردنەكانی ئەنجوومەنی نوێنەران، بەرهەم ساڵح سەرۆكی هاوپەیمانی بۆ دیموكراسی و دادپەروەری لە میانی وتارێکیدا لەکاتی بەنگەشەکردن بۆ لیستەکەی کە ژمارە 153ە، لەبەردەم ئامادەبوان رایگەیاند،" ئەم هەڵبژاردنە لەكاتێكدایە بەداخەوە بارودۆخی ئێستای كوردستان نالەبارە و ئایندەی ئەم گەلە دووچاری مەترسییە و باروگوزەرانی خەڵكی خراپە و خزمەتگەزارییەكان لە ئاستی پێویستدا نیین".
وتیشی، "هەمووتان لەدڵەڕاوكێی هاتن و نەهاتنی مووچە و دەستتێوەردان لە بازاڕ، پاوانی كۆمەڵێك سیاسیی بازرگانی چاوچنۆك كە بوونەتە هۆكاری شێواندنی ئابووری و بازاڕی ئەم وڵاتە، بوونەتە هۆكاری نەمانی ئاشتەوایی كۆمەڵایەتی و سیاسی".
هەروەها وتی،" بەهۆی سیاسەتی هەڵە و بێ باك و هەرزانفرۆشی ماف و خاك نیوەی نیشتیمانەكەمان لەدەستدراوە و شۆڤینیزمەكانیش بەنیازن قەوارەی سیاسی هەرێمی كوردستان بنكۆڵ بكەن و بمانبەنەوە دۆخی پاشكۆ بوون".
بەرهەم ساڵح لە درێژەی وتارەیەکدا ئەوەشی خستەڕوو، "ئەم گەلە لەساڵی 1964ەوە تاڵاوی دووبەرەكی و ناخۆشی دەچێژێ و كاتی هاتووە هەموومان پێكەوە هاوكار و هەماهەنگ بین بۆ كۆتایی هێنان بەم زوڵمە، دوور لە موزایەدە و بێ هیچ دوو دڵ و تەشهیر و تەخوینێك هاتووین شكۆ بۆ هاوڵاتی ئەم وڵاتە بگەڕێنینەوە".
جەختی لەوەشکردەوە،" ئەركی ئێمە لە هاوپەیمانی دووبارە رێكخستنەوەی عێراقە لەسەر بنچینەی دەستوور و رووبەڕووبونەوەی هەوڵە شۆڤینییەكانە بۆ پەراوێزخستنی خەڵكی كوردستان، بۆیە واقیع پێمان دەڵێت عێراق پێویستی بە پێداچوونەوەیەكی گشتگیری سیاسی و ئابووری هەیە بۆ ئەوەی چارەسەری گێژاوی قەیرانەكانی بكات، هەروەها گەلی كورد خاوەن مافی چارەنووسە و كەس ناتوانێت ئەوەی لێ زەوت بكات، یەكێتی خاكی عێراق بەزەبر و زەنگ و بەهێز ناپارێزرێت، بەڵكو بە جێبەجێكردنی دەستوور و و بەدیموكراسی و بەرژەوەندیی هاوبەش دەبێت".
سەرۆکی لیستی هاوپەیمانی بۆ دیموکراسی و دادپەروەری باسی مافەكانی نەتەوەی كورد کرد کە بە زەبر و زەنگ كۆتایی نایەت، بەپێویستیشی زانی کە پێكهاتەكان هەماهەنگ بن و لێنەگەڕێن رۆڵەكان ببێتە قوربانی شەڕی بە وەكالەت.
هەروەها وتی، "نابێت رێگە بدەین مووچە و قووتی هاوڵاتی ببێتە قوربانی ناكۆكییەكانی هەرێم و حكوومەتی عێراق، ناكرێت بارودۆخی كەركوك ئاوا بەردەوام بێت، ناكرێت بۆ كۆمەڵێك قاچاخچی ململانێیەكانییان لەكەركوك و لەسەر حسابی خەڵكی كەركوك یەكلایی بكەنەوە، بۆیە بە ئاشكرایی دەڵێن دەبێت زوڵمی پاشەكەوتی مووچە كۆتایی پێ بێت، ئەمە تاوانێكی گەورەیە لە خەڵك و مووچەخۆرانی كوردستان كراوە و دەكرێت".
لە کۆتایی وتارەکەیدا بەرهەم ساڵح سەبارەت بە هێزە چەكدارەكانی وتی" ئامانجمان یەكخستنی هێزەكانی پێشمەرگەیە و حەیفە پێشمەرگەی پارێزەری خاكی كوردستان مووچەكەی نیوەی مووچەی سەربازی عێراق بێت".
ئەمڕۆ یه‌كشه‌ممه 15ی نیسانی 2018، بانگه‌شه‌ی حزب و قه‌واره و هاوپه‌یمانێتی و كاندیده‌كان بۆ هه‌ڵبژاردنه‌كانی ئه‌نجوومه‌نی نوێنه‌رانی عێراق به‌پێی رێنماییه‌كانی كۆمیسیۆنی باڵای سه‌ربه‌خۆی هه‌ڵبژاردنه‌كانی عێراق دەستیپێکرد، کە بڕیار وایە لە 12ی ئایاری 2018دا، بەرێوەبچێت، تیایدا حەوت هه‌زارو 188 كاندید له نزیك به 100 قه‌واره و هاوپه‌یمانێتی ركابه‌رایه‌تی له‌سه‌ر 329 كورسیی په‌رله‌مانی ده‌كه‌ن، کە هەولێر 15 كورسی و سلێمانی 18 كورسی و دهۆكیش 11 كورسیی بۆ دیاریكراوە و 3 ملیۆن و 144 هەزار و 730 دەنگدەر لە هەرێمی كوردساندا هەن و 25 لیست و 4 هاوپەیمانێتی بە زیاتر لە 710 كاندید ركابەرایەتیی دەكەن.