سەرۆکی حکومەتی هەرێمی کوردستان بڕیاریدا بە زیادکردنی بڕی دوو ملیار دینار مانگانە بۆ وەزارەتی ناوخۆ، ئەوەش لە چوارچێوەی دەستکاریکردنی پاشەکەوتی موچەی پاسەوانان.
رێباز حەملان، وەزیری دارایی و ئابووریی هەرێمی کوردستان راگەیاند، "بە فەرمانی نێچیرڤان بارزانی، سەرۆکی حکومەتی هەرێمی کوردستان، مانگانە بڕی دوو ملیار دینار بۆ وەزارەتی ناوخۆ زیادکرا".
وەزیری دارایی و ئابوری هەرێم بۆ "روداو" ئەوەشی وتووە، "ئەو زیادکردنە لە پێناو باشکردن و دەستکاریکردنی بڕی پاشەکەوتی مووچەی پاسەوانان دایە".
ئەو زیادکردنەش لەکاتێکدایە پێشتر وەزارەتی دارایی بڕیاریدا مانگانە بۆ هەر وەزارەتێک بڕی 12 ملیار دینار زیادبکات و هاوکات وەزارەتەکاننیشی سەرپشک کرد، کە چۆن دەستکاری مووچەی مووچەخۆرەکانیان دەکەن، بەڵام ئەم بڕیارە پاسەوانانی نەگرتەوە، ئەمەش نیگەرانی و ناڕەزایەتیی پاسەوانانی لێکەوتەوە.
لە رۆژی ١٥ی ئەم مانگە پاسەوانانی دادوەران و وەزیرەكان بەهۆی ئەوەی %65 ی موچەكەیان پاشەكەوت كراوە و بڕیاری کەمکردنەوەی سیستمی پاشەکەوتی موچە ئەوانی نەگرتبووەوە هەولێر گردبوونەوە یەکی ناڕەزایەتییان لەبەردەم دادگای تێهەڵچونەوەی هەولێر ئەنجامداو داوایان کرد هاوشێوەی موچەخۆرانی تر ڕێژەی پاشەیكەوتی موچەكانیان كەم بكرێتەوە.
