پارتی دیموکراتی کوردستان دژی جیاکردنەوەی ئەنجامەکانی دەنگدانی هەڵبژاردنی پەرلەمانی لە رێگای هەژماری دەستیەوە نییە.
وتەبێژی پارتی دیموکراتی کوردستان روونکردنەوەیەکی لەسەر هەڵێوێستی حیزبەکەی دەربارەی ئەنجامی هەڵبژاردنەکان راگەیاند و دەڵێت " دوابەدوای راگەیاندنی دەرئەنجامەكانی پرۆسەی هەڵبژاردنی ئەنجوومەنی نوێنەرانی عێراق، نیگەرانی و گومان لەو دەرئەنجامانە بڵاوبۆوە، ئێمەش وەكو پارتی دیموكراتی كوردستان بە شێوەیەكی فەرمی لە بەیاننامەی مەكتەبی سیاسیماندا رامانگەیاند کە لە دەرئەنجامەکان گومانمان هەیە و غەدرێكی زۆریش لە پارتی كراوە، بۆیە بۆ رەواندنەوەی كۆی گومان و نارەزاییەتییەكانی لایەنەكان بە باشی دەزانین كۆمیسیونی باڵای سەربەخۆیی هەڵبژاردنەكان لە چوارچێوەی یاسادا كاری پێویست ئەنجام بدات".
مەحمود محەمەد وتەبێژی پارتی لە روونکردنەوەکەیدا دەڵێت " ئێستاش بابەتی دەرئەنجامەكان بووەتە ئاڵۆزییەکی زۆری راگەیاندنەكان و هەر كەس و لایەنێك بە شێوازێك شرۆڤەی دەكات و بەئاقارێكدا قسەی لەسەر دەكا، بۆیە و لە روانگەی هەست بە بەرپرسیارییەتی و بە خەمەوە بوونی پاراستنی سەقامگیری و رەواندنەوەی گومانەکان، هەر بریارێك بدرێت بە رێگای یاسایی بۆ ژماردنەوەی دەنگەكان بەدەست و بۆ مەبەستی گێرانەوەی متمانەی لایەنە سیاسییەكان و دەنگدەران، ئێمە بە باشی دەزانین و تەئیدی دەكەین".
پارتی دژی ئیلغاکردنەوەی دەنگدانی کەرکوکەو دەڵێت " بریاری ئەنجوومەنی نوێنەرانی عێراق كە بە تەنیا دەرئەنجامەكانی هەرێمی كوردستان و كەركوك ئیلغا دەكاتەوە، رەت دەكەینەوە و بە بریارێكی سیاسی دەزانین".
لە کۆتاییدا وتەبێژی پارتی دەڵێت " لە پێناوی چارەسەری كێشە و رەواندنەوەی گومانەكان و زیاتر ئاڵۆز نەكردنی بارودۆخەكە، ئامادەی هەموو جۆرە هاوكارییەكین كە بە رێگای دەستووری و یاسایی هەنگاوی بۆ بهاوێژێ".
رۆژی ٢٨ ی ئایار پەرلەمانی عێراق بڕیاری دا کە لە ١٠% دەنگی پارێزگاکان لە رێگای دەستیەوە هەژمار بکرێتەوە، ژمارەیەک هێزی سیاسی لەگەڵ ئەم هەنگاوەدان، بە پێچەوانەوە هەندێک هێز دژی ئەم هەنگاوەن، لە پێش هەمووشیانەوە یەکێتی نیشتمانی کوردستان.