ناسنامەی ئەو کەسه ئاشکرابوو کە لەناو مەککەدا خۆی کوشت

میدیاكانی سعودیە بڵاویانكرده‌وه‌، رۆژی هه‌ینی له‌ناو حه‌ره‌می مه‌ككه‌دا كه‌سێك له‌ نهۆمی سه‌ره‌وه‌ی حه‌ره‌می سوڕانه‌وه‌ به‌ ده‌وری كه‌عبه‌ی پیرۆزدا، خۆی هه‌ڵداوه‌ته‌وه‌ خواره‌وه‌ و خۆی كوشتووه‌.

به‌پێی ئه‌و زانیارییانه‌ی كه‌ له‌ ناسنامه‌ی كه‌سه‌كه‌ وه‌رگیراوه‌ و وه‌زاره‌تی حه‌ج و عه‌مره‌ی عه‌ره‌بستانی سعودی بۆی ده‌ركردوه‌، خۆكوژه‌كه‌ فه‌ره‌نسییه‌کی به‌ره‌گه‌ز جه‌زائیرییه‌، ئه‌مه‌ش ئه‌و هه‌واڵانه‌ی ره‌تكرده‌وه‌ كه‌ ده‌وترا به‌ ره‌گه‌ز خه‌ڵكی كیشوه‌ری ئاسیایه‌.

ئه‌و خۆكوژه‌ به‌ناوی ئازۆز بۆتۆبا، ته‌مه‌نی 26 ساڵه‌ و له‌ 18ی مانگی ره‌مه‌زاندا له‌ فڕۆكه‌خانه‌ی ئه‌میر محه‌مه‌د چوه‌ته‌ عه‌ره‌بستانی سعودی و بڕیاربووه‌ دوای پێنج رۆژ مانه‌وه‌ سعودیه‌ به‌جێ بهێڵێت.

رۆژنامه‌ی سه‌به‌ق-ی چاپی عه‌ره‌بستانی سعودی بڵاویكرده‌وه‌ كه‌ هاوڵاتییه‌كه‌ له‌ وێستگه‌ی یه‌كه‌می سه‌ردانه‌كه‌یدا چووه‌ته‌ شاری مه‌دینه‌ و یه‌ك رۆژ له‌وی ماوه‌ته‌وه‌، دواتر بۆ ئه‌نجامدانی عه‌مره‌ چووه‌ته‌ شاری مه‌ككه‌ و له‌ هۆتێلێكی گه‌ڕه‌كی عه‌زیزیه‌ له‌و شاره‌ نیشته‌جێ بووه‌.

دوای خۆهه‌ڵدانه‌ خواره‌وه‌شی له‌و به‌رزاییه‌ ده‌ستبه‌جێ گیانی له‌ده‌ستداوه‌ و ته‌رمه‌كه‌ی له‌ نه‌خۆشخانه‌ی شا فه‌یسه‌ڵ له‌ شاری مه‌ككه‌ هه‌ڵگیراوه‌ تا كۆتایی لێكۆڵیینه‌وه‌كان كه‌ له‌و روداوه‌ ده‌ستپێكردوه‌.


ئه‌م بابه‌ته ‌5908 جار خوێنراوه‌ته‌وه‌‌

AM:08:45:10/06/2018