بڕیارە رۆژی سێشەممەی داهاتوو جیاكردنەوەی دەنگەكانی ئەو سندوقانەی پارێزگای سلێمانی دەستپێبكات كە تانە و سكاڵایان لەسەر تۆمار كراوە.
میدیای فەرمی یەكێتیی نیشتمانیی كوردستان بڵاویكردەوە كە بڕیارە رۆژی سێشەممەی داهاتوو دەستبكرێت بە جیاكردنەوەی 188 سندوقی پارێزگای سلێمانی كە تانە و سكاڵایان لەسەر تۆمار كراوە.
ئەوەشیخستەڕوو كە نووسینگەی سلێمانی كۆمسیۆنی باڵای سەربەخۆی هەڵبژاردنەكانی عێراق ئامادەكاریی بۆ جیاكردنەوەو ژماردنەوەی دەستیی دەنگەكانی نێو ئەو سندوقانە كردووە.
پرۆسەكەش بە ئامادەبوونی دادوەرانی دەستنیشانكراوی كۆمسیۆنی هەڵبژاردنەكان و نوێنەری قەوارە سیاسییەكان و بەسەرپەرشتی نوێنەری نەتەوە یەكگرتووەكان دەبێت.
ئەوەش لەکاتێکدایە دوێنێ كۆمسیۆنی هەڵبژاردنەكان، كۆتاییهاتنی پرۆسەی جیاكردنەوە و ژماردنەوەی دەستیی دەنگەكانی لە پارێزگای كەركوك راگەیاند.