سەنتەری میترۆ بۆ داکۆکی لە ڕۆژنامەنووسان بڕیارەکەی حکومەتی عێراق بۆ ڕاگرتنی تۆڕە کۆمەڵایەتییەکان ئیدانە دەکات و داواش دەکات بکرێنەوە.
لە بەیاننامەیەکدا هاتووە، سەنتەری میترۆ دەڵێت "ئیدانەی بڕیارەکەی حکومەتی عێراق دەکەین بۆ ڕاگرتنی تۆڕە کۆمەڵایەتییەکان و ڕێگە گرتن لە ڕۆژنامەنووسان بۆ ڕووماڵکردنی خۆپیشاندانی هاوڵاتیان و دەستگیرکردنیان کە هەوڵێکە بۆ شاردنەوەی تاوانی هێزە عێراقییەکان دژ بە خۆپیشاندەران."
سەنتەری میترۆ لە بەیاننامەکەدا داوا لە ڕێکخراوە نێودەوڵەتییەکان دەکات فشار بخەنە سەر حکومەتی عێراق تاوەکو تۆڕە کۆمەڵایەتییەکان بکاتەوە و ڕێگە بدات بە گواستنەوەی زانیاری بۆ ڕای گشتی.
ئەمڕۆ خۆپیشاندان لە شاری بەسرە و نەجەف بەشێوەیەکی بەرفراوان دەستیپێکردووە و خۆپیشاندەرانی شاری بەسرە لەبەردەم بینای پارێزگا کۆبوونەتەوە و لەلایەن هێزە ئەمنییەکانەوە بە غازی فرمێسکڕێژ هێرشیان کراوەتەسەر و بەوهۆیەشەوە بە دەیان خۆپیشاندەر برینداربوون و ڕەوانەی نەخۆشخانە کراون.
هاوکات هەر ئەمڕۆ خۆپیشاندان لە پارێزگای زیقار و میسان و چەند ناوچەیەکی تر ئەنجامدراوە و حکومەتی عێراقیش ئینتەرنێت و تۆڕە کۆمەڵایەتییەکانی ڕاگرتووە.
بەهۆی نەبوونی خزمەتگوزاریی و کەمی ئاو و کارەباوە ماوەی چەند ڕۆژێکە خۆپیشاندان لە شارەکانی باشوری عێراق سەریهەڵداوە و لە هەندێک شاریش توندوتیژی دروستبووە و بەوهۆیەشەوە ژمارەیەک کەس کوژراون و بریندار بوون.
هەر بەو هۆیەشەوە حکومەتی عێراق قەدەغەی هاتوچۆی لە بەسرە ڕاگەیاندووە و نزیکەی ٣٠ هەزار سەربازی لەو شارانەی ناڕەزایەتییان تێدایە بڵاوکردووەتەوە.
f.q