جوڵانەوەی نەوەی نوی ڕایگەیاند دژی هەموو هەوڵێکن کە بۆ دواخستنی هەڵبژاردنی پەرلەمانی کوردستان دەدرێت.

جوڵانەوەی نەوەی نوێ لە ڕاگەیەندراوێکدا کە وێنەیەکی بۆ سپی نێردراوە دەڵیت " جوڵانەوەی "نەوەی نوێ‌" دژی هەر هەوڵێكە بۆ دواخستنی ئەم هەڵبژاردنە چونکە ئەو هەوڵە سوكایەتییە بە پڕۆسەی دیموكراسی و زەرورەتی هەڵبژاردن وەك یەكێك لە پایەکانی دیموكراسیی ،وە ئەم هەوڵە ترسی حزبەكانی دەسەڵاتە لە دۆڕاندنیان، کە پێمان وایە جووت حزبی دەسەڵات و ئۆپۆزیسیۆنی تەقلیدی هاوڕاو هاوکارن بۆ دواخستنی هەڵبژاردنەکان کە ئەمەش گوزارشتە لە ترسی قووڵی هەموو حزبە تەقلیدیەکان لە گەشەکردن و سەرکەوتنەکانی نەوەی نوێ و ئاوابوونیی دەسەڵاتی شکستخواردوو."

ڕاشیانگەیاندووە "ئەم هەوڵانە بۆ دواخستنی هەڵبژاردنەکان ئاماژەیەکی ئاشکرایە کە حزبەکانی دەسەڵات و هاوکارەکانیان روبەروی شکستی قوڵ و هەمەلایەن بونەتەوەو دەترسن لە هەلبژاردنی داهاتودا نەتوانن بە تەزویریش شکستەکانیان بپۆشن، هەروەها دەترسن بەشداری فراوانی دەنگدەرانی کوردستان و پشتیوانی چین و تویژە جیاجیاکان بۆ نەوەی نوێ روبەروی شکستی گەورەیان بکاتەوە. "

لە کۆتایی ڕاگەیندراوەکەدا هاتووە بۆیە جوڵانەوەكەمان هەر هەوڵێك بۆ دواخستنی هەڵبژاردن، بە توندیی رەتدەكاتەوە و هەروەها لە ناوەوە و دەرەوەی هەرێم هەوڵەکانی دەخاتە گەر بۆ شکستپێهێنان بە دواخستنی هەلبژاردن.