پۆلیسی سلێمانی ڕایگەیاند، لە هەڵمەتێکی گەڕان و پشکنیندا بۆ گازینۆ و كافتریاكان ٦٠ کەس بە تۆمەتی قومارکردن دەستگیرکران.
پۆلیسی سلێمانی لە ڕاگەیاندراوێکدا ئاماژەی بۆ ئەوەکرد، دوای چاودێریكردنی گازینۆكان و كافتریاكانی شاری سلێمانی لەلایەن هێزەكانیانەوە، زانرا لەبەشێك لە گازینۆ و کافتریاکان قومار دەکرێت.
ئەوەشی خستەڕوو "لە هەڵمەتێکی پشکنیندا لەلایەن بەشی پۆلیسی نەهێشتنی تاوان و بنكەی پۆلیسی سەرا توانیومانە ٦٠ کەس دەستگیر بکەین کە قوماریان کردووە".
ڕاشیگەیاندووە، لەئێستاشدا تۆمەتباران بەپێی ماددەی ٣٨٩ لەیاسای سزادانی عێراقی و بە فەرمانی دادوەر ڕاگیراون و لەلایەن بنكەی پۆلیسی سەراوە پەڕاوی لێكۆڵینەوە كراوەتەوە .
بەڕێوەبەرایەتی پۆلیسی پارێزگای سلێمانی ئاماژەی بە ئەوەش کرد، كە هەڵمەتەكانی بۆ گەڕان و پشكنین لە تەواوی گازینۆ و كافتریاكانی شاری سلێمانی بەردەوامییان دەبێت و سەرجەم تۆمەتباران ڕوبەڕوی یاسا دەكرێنەوە.