لە راگەیێندراوێکدا کە وێنەیەکی دەست سپی کەوتووە، تیایدا بەڕێوەبەرایەتی پۆلیسی پارێزگای سلێمانی ئاماژەی بەوەکردووە "دوای ئەوەی هێزەكانی بنكەی پۆلیسی سەرا زانیارییان پێگەیشت دوو تۆمەتبار لەشاری هەولێرەوە هاتوونەتە شاری سلێمانی و بەنیازن چەند پارچە چەكێك ساغ بكەنەوە و بیفرۆشن، هێزەكانی پۆلیس لێكۆڵینەوەكانیان دەستپێكرد و دوای وەرگرتنی فەرمانی دادوەر هەردوو تۆمەتبارەکەیان دەستگیركرد".

لە راگەیێندراوەکەی پۆلیسی سلێمانی هاتووە "لەكاتی دەستگیركردنیشیدا دەستگیرا بەسەر شەش پارچە چەكدا كە بەنیاز بوون لەشاری سلێمانی بیفرۆشن. هەردوو تۆمەتبار (ف ، م ، أ) و (ج ، ح ، ع) دانیشتووی شاری هەولێر، بەفەرمانی دادوەر و بەپێی ماددەی 21ی چەك راگیراون و لێكۆڵینەوە لەوبارەوە دەستیپێكردووە".