پۆلیسی سلێمانی ڕایگەیاند ئەوان لەسەر رووداوی کوشتنی هاوڵاتییەک لە گازینۆیەکی سەهۆڵەکە چوار کەسیان دەستگیرکردووە، بەڵام تۆمەتباری سەرەکی دەستگیر نەکراوە.
لە ڕاگەیەندراوێکدا کە وێنەیەکی بۆ ماڵپەڕی سپی میدیا نێردراوە تیایدا هاتووە " ئێوارەی ئەمڕۆ كاتژمێر 3:30 خولەك لە نێو گازینۆیەكدا لە شەقام سالم دەستدرێژی گولە لە هاوڵاتیەك كرا و گیانی لەدەستدا".
لە راگەیەندراوەکەدا هاتووە" دوای گەیشتنی هێزەكانی پۆلیسی فریاكەوتن و بنكەی پۆلیسی رزگاری و تیمەكانی بەشی پۆلیسی بەڵگەی تاوان، كەشف و هێڵكاری بۆ شوێنی رووداوەكە كرا و دەركەوت كە تۆمەتبارێك تەقەی لە هاوڵاتیەك كردووە و 3 فیشەكی پێوە ناوە.
پۆلیسی سلێمانی ڕاشیگەیاند دوای بەدوادواچوونی هێزەكانی پۆلیس و وەرگرتنەوەی كامێرای چاودێری , توانرا 4 تۆمەتبار دەستگیربكرێن و لە ئێستادا ئەنجامدەری سەرەكی تاوانەكە هەڵهاتووە و هێزەكانی پۆلیس لە گەڕان و لێكۆڵینەوەدان بۆ دەستگیركردنی.
سپی، پێشتر بڵاویکردەوە کە کوشتنی ئەو هاوڵاتییە لەسەر کڕین و فرۆشتنی ئۆتۆمبیل بووەو، لە نێوان قوربانی و تۆمەتبارەکەدا بڕی ١٥هەزار دۆلار هەبووە.