دەشڵێت "ئەمەی ئێمە و هاوڕێکانمان دەیچێژین، باجی هەڵوێستەکانمانە، نەک باجی هەڵە! زۆرێک هەن هەڵەی گەورە و تاوانی گەورەیان ئەنجامداوە، بەلام ئازادانە دەسوڕێنەوە لەم وڵاتەدا".

سەرۆکی جوڵانەوەی نوێ ئاماژەی بەوەشکردووە"گۆڕانکاری گەورە قوربانیدانی دەوێت، پشودرێژی و خاوەن ئیرادەیی دەوێت، ئەوە دەیباتەوە کە باوەڕی بە خۆی و قەزیەکەی خۆی هەیە. هەموو لایەک دڵنیادەکەینەوە کە لە جاران بەهێزتر دەبین و کۆڵنادەین، ئەوەی ئێمە بیری لێدەکەینەوە چەند ساڵێکی ترە، نەک ئەم وێستگە کاتییە بچوکانەی ئێستا، چونکە ئەمانە تێدەپەڕێت، ئەوەی دەمێنیتەوە بۆ مێژوو و بۆ داهاتوو، راستی و خاوەن هەڵوێستییە".

دوێنێ چوارشەممە 15-5-2019ـش دادگای لێکۆڵینەوەی ئاسایشی گشتیی لە سلێمانی فەرمانی دەستگیرکردنی بۆ شاسوار عەبدولواحید دەرکرد و رایگەیاند، فەرمانی دەستگیرکردنەکە "لەسەر ماددەی 2 لە یاسای قەدەخەکردنی خراپبەکارهێنانی ئامێرەکانی پەیوەندییە".

دوای سکاڵاکەی شادی نەوزاد، ئاسایشی سلێمانی دوو سکرتێری شاسوار عەبدولواحید و 10 ئەندامی دیکەی جوڵانەوەی نەوەی نوێی دەستگیرکرد، کە دواتر لە دانپێدانانەکاندا رایانگەیاند، لە سۆشیاڵمیدیای جوڵانەوەکە کاریان کردووە.