عادل عەبدولمەهدی سەرۆكی وەزیرانی عیراق رایدەگەیەنێت تائێستا حكومەتی هەرێم یەك بەرمیل نەوتی رادەست نەكردووە، بەڵام موچەی فەرمانبەران نابڕین.
سەرۆك وەزیرانی عیراق، لەمیانەی كۆنگرەیەكی رۆژنامەوانیدا رایگەیاند: تائێستا حكومەتی هەرێم پابەندی بڕگەو مادەكانی تایبەت بە هەناردەی نەوت نەبووە، كە یاسای بودجەی 2019دا هاتووەو یەك بەرمیل نەوتی رادەستی بەغدا نەكردووە.
وتیشی: بەڵام حكومەتی عیراق پابەند دەبێت بە رەوانەكردنی موچەی مانگانەی فەرمانبەرانی هەرێم و موچەكەیان نابڕین.
لە یاسای بودجەی ٢٠١٩ دا پشكی هەرێم بە ١٢.٦٧% دیاریکراوە و بەپێی یاساکەش، ئەگەر هەرێم پابەند نەبێت بەوەی نەوت ڕادەستی کۆمپانیای سۆمۆ بکات، ئەوا بەغدا مانگانە تەنها ٥٢٢ ملیار دینار بۆ هەرێمی کوردستان دەنێرێت، بۆ موچەی فەرمانبەران و هێزەکانی پێشمەرگەیە، ئەگەر نەوتیش ڕادەستی بەغدا بکات ئەوە کۆی ئەو بڕە پارەیەی بەپێی بودجە دەدرێتە هەرێم لەمساڵدا زیاترە لە نۆ ترلیۆن دینار.