سه‌رۆكی هه‌رێمی كوردستان رایگه‌یاند كه ھه‌رێمی كوردستان ئاماده‌یه به‌پێی ده‌ستوور سه‌رجه‌م كێشه‌کانی له‌گه‌ڵ بەغداد چاره‌سه‌ر بكات.
ئه‌مڕۆ پێنجشه‌ممه 20ی حوزه‌یران ، نێچیرڤان بارزانی بە یاوەری وەفدێک یه‌كه‌م سه‌ردانی بۆ به‌غدای پایته‌ختی عیراق وه‌ك سه‌رۆكی هه‌رێمی كوردستان ئه‌نجامدا و لەگەڵ هەریەک لە د.به‌رهه‌م ساڵح سه‌رۆك كۆماری عیراق، عادل عه‌بدولمه‌هدی سه‌رۆك وه‌زیران و محه‌مه‌د حه‌لبوسی سه‌رۆكی ئه‌نجومه‌نی نوێنه‌رانی عیراق كۆبووه‌وه.
لە دوای کۆبونەوەکانی نێچیرڤان بارزانی له په‌یجی تایبه‌تی خۆی له فه‌یسبووك بڵاویکردەوە "ئه‌مڕۆ له به‌غدا له‌گه‌ڵ به‌ڕێزان سه‌رۆك وه‌زیران، سه‌ركۆمار و سه‌رۆكی ئه‌نجومه‌نی نوێنه‌ران كۆبوومه‌وه‌و، دووپاتم كرده‌وه كه ھه‌رێمی كوردستان ئاماده‌یه سه‌رجه‌م كێشه ھه‌ڵپه‌سێردراوه‌كانی له‌گه‌ڵ حكومه‌تی فیدڕاڵی عیراق به‌پێی ده‌ستوور چاره‌سه‌ر بكات و له هه‌موو بواره‌كاندا هاوكاری و هه‌ماهه‌نگی بكه‌ین".