گرتەیەکی ڤیدیۆی رووداوی کوشتنی بەرپرسە تورکەکە لەهەولێر بڵاودەکرێتەوە

گرتەیەکی ڤیدیۆی ساتی کوشتنی بەرپرسە تورکەکە لە ریستورانتی هۆقە لە هەولێر بڵاودەکرێتەوە.

لە گرتە ڤیدیۆیەکەدا کە " رووداو "بڵاویکردەوە کەسێک لە سوچێکدا دانیشتووە و چاودێری بەرپرسە تورکەکە دەکات کە لە مێزێکی نزیکیەوە دانیشتووەو لەگەڵ کەسێکدا قسە دەکات، دوو کەسی تریش لەگەڵ کارمەندێکی ریستورانتەکە دێنە ژوورەوەو تەماشایەکی بەپەلەی بەرپرسە تورکەکە دەکەن و دەچنە شوێنێکی ریستورانتەکە دادەنیشن.

ئەو گەنجەی کە بکوژو تەقەکەری سەرەکیە، سەرەتا مۆبایلەکەی دەردەکات، بەڵام کاتێک دەزانێت کە بەرپرسە تورکەکە نزیک لە هەستانەوە تا بڕوات، لە جانتایەکی لایەوە دەمانچەیەک دەردەکات و چەند فیشەکێک دەنێت بە بەرپرسە تورکەکەوە، دواتر دوو هاورێکەشی دێن بە راکردنەوە سەرو فیشەکە بەئاراستەی بەرپرسە تورکەکە دەتەقێنن و لە ریستورانتەکە هەڵدێن.
ئەوەی جێگای سەرنجە بکوژی سەرەکی مۆبایلەکەی لەسەر مێزەکە جێدەهێڵیت، هەروەها ئەو جانتایەشی کە دەمانچەکەی لیدەردەهێنێت لێی بەجێدەمێنێت و بیری نییە کە بیبات لەگەڵ خۆیدا.
رووداو، ئاماژە بۆ ئەوە دەکات کە ئەو ڤیدیۆیەی لە تۆڕە کۆمەڵایەتییەکان وەرگرتووە.
رۆژی ١٧ ی تەموز لە ریستورانتی هۆقە لە هەولێر، سێ کەس تەقەیان لە بەرپرسێکی تورک کردو کوشتیان، هەر لەو رووداوەدا دوو کەسی تریش کە هاوڵاتی هەرێم بوون کوژران.




ئه‌م بابه‌ته ‌1612 جار خوێنراوه‌ته‌وه‌‌

AM:10:37:24/07/2019