" هەر لایەن و کەسێک ئاسایشی عێراق تێکبدات ئەمەریکا سزای دەدات "
کۆنگرێسی ئەمەریکا یاسایەک پەسەند دەکات کە هەر لایەن و کەسێک ئاسایش و ئارامی عێراق تێکبدات روو بەرووی سزا دەبێتەوە.
ئاژانسەکان بلآویان کردەوە، کۆنگرێسی ئەمەریکا یاسایەکی لە قازانجی عێراقیەکان دەرکردووە هەر لایەن و کەسایەتیەک ئارامی و ئاسایشی عێراق تێکبدات، رووبەرووی سزا دەبێتەوە.
بەپێی یاساکە هەر لایەنێک ئارامی و ئاسایشی عێراق تێکبدات روو بەرووی سزای ئابوری و دارایی دەبێتەوە.
هەروەها یاساکە وەزیری دەرەوەی سەرپشک کردووە کە هەموو ساڵێک لیستێک دروست بکات بۆ ئەو رێکخراو لایەن و دەوڵەتانەی دەوری نێگەتیڤیان هەیە لە ئاسایشی عێراقدا، تا روو بەرووی سزای ئابوری و دارایی بکرێنەوە.
ئەم دەسەلآتە پێشتر لەلایەن دۆناڵ ترامپەوە، بڕیاری لەسەر دەدرا، وەک ئەو سزایەی دوو هەفتە لەمەوبەر سەپاندی بەسەر چوار کەسایەتی شیعەو سونەی عێراقی، بەلآم ئەمجارە یاسایی تر و فراوانتر کراوەو کۆنگرێس بڕیار لەسەر یاساکە داوە.
ئەو یاسایە لە کاتێکدایە کە ئەمەریکا سزایەکی توندی هەمەلایەنەی خستۆتە سەر ئێران و رێکخراوانەی لەو ولآتەوە نزیکن و کۆمەک دەکرێن.
PM:08:00:27/07/2019