نیگەرانی هەیە ئەگەر دۆخی عێراق تێکبچێت، هەرێم بە کاردانەوەی ڕۆژانە بارودۆخ بەڕێ بکات

گرووپی  " پەنجەرە " لە واتس ئاپ کە گرووپێکی چالاکی ژمارەیەک سیاسی و رۆشنبیرە، پاش هەفتەیەک لە گفتوگۆ لەسەر دۆخی ئەمنی عێراق و ئەگەری تێکچوونی، نیگەرانن لەو روودانی حاڵەتێکی وەهادا هەرێم تەنها بە کاردانەوەی ڕۆژانە بارودۆخ بەرێ بکات.

گرووپی پەنجەرە لە وەتس ئاپ کە گرووپێکە ژمارەیەک رۆشنبیر و رۆژنامەنووسی سەربەخۆ و سەر بە حیزبەکان و، ژمارەیەک سیاسی کۆکردۆتەوە، لەدوا دۆسیە کە گفتوگۆیان لەسەر کرد، ئەو کێشە ئەمنی و سیاسیانەیە کە دوای تەقینەوەی سەربازگەو جبەخانەکانی حەشدی شەعبی لەسەرئاستی سیاسی و ئەمنی لە عێرقدا هاتۆتە ئاراوە کە مەترسی لەسەر کۆی پرۆسەی سیاسی لە عێراق دروستکردووە.

ئەو گرووپە دوای هەفتەیەک لە گفتوگۆ پوختەی شیکاری خۆیان بە ناونیشانی " كوردستان لەبەردەم تەنگەژە ئەمنییەكانی ئەمدواییە عێراقدا" خستۆتە روو کە بەدیوێکیدا دۆخەکە لە چەندان رووی جیاجیاوە  شیدەکەنەوە، لە دوا بڕگەشدا پێشنیاری خۆیان و نیگەرانیەکانیان بۆ حکومەتی هەرێم و دەزگا فەرمیی و حیزبەکانی تر دەخەنە ڕوو. 
دەقی راپۆرتەکە..

كوردستان لەبەردەم تەنگەژە ئەمنییەكانی ئەمدواییە عێراقدا
پوختەی گفتوگۆی بەشدارانی گروپی واتساپی "پەنجەرە"
22 ئابی 2019 

چی دەگوزەرێت؟ 

 بەمدواییانە زنجیرەیەك تەقینەوە كۆگاكانی چەكی حەشدی شەعبی لەناوچە جیاجیاكانی عێراق گرتەوە، ئەم تەقینەوانە كە مشتومڕی زۆر لەسەر هۆكارو ئەنجامدەرەكەی هەیەو باوەڕی زاڵ وایە هێرشی ئیسرائیلی بن  عێراقی خستۆتە بەردەم دوو رێیانێكی دژوار؛ دەزگاكانی دەوڵەت كە سەرۆكایەتییەكانن لەگەڵ دان بەخۆداگرتن و هەوڵی رێگاچارەی دیبلۆماسیی و خۆ پارێزیدان، بەڵام باڵە ئێرانییەكانی حەشد مەیلیان بۆ گوتاری "موقاوەمەت" و هەڕەشەی بەرەنگاریی هەیەو لەم میانەیەشدا ئەبو مەهدی موهەندیس كە فەرمادەی مەیدانی حەشد و جێگری سەرۆكی دەستەی حەشدی شەعبییە بەیاننامەیەكی توندی دەركردووە كە درزی گەورەی لەنێوان سەركردەكانی حەشد ئاشكراكردووە سەبارەت بەپێشهاتەكانی ئەمدواییە.

هەموو ئاماژەکان دەڵێن شەڕ لەنێوان ئەمریکا، ئیسڕائیل و ئێران، لە ناو عێڕاقەوە دەستیپێکردوە.  چەند جارێکە ئیسڕائیل بە ئاشکرا بۆردمانی عێڕاق دەکات. ئامانجی ئەم شەڕە قوڵایی ئێرانە بۆ ئەمە مەبەستەش هەماهەنگی سوپایی لە نێوان ئەمریکا و ئیسڕائیل گەیشتۆتە لوتکە و ئەمەش وەها دەكات عێراق بێدەسەڵات بێت بەرامبەر ئەم هاوكێشەیەو ترسناكی دۆخەكەش لەوەدایە شەڕە گەورەکان هەر ئاوها دەستیان پێكردووە، بەڵام هەندێ ئاماژەی گرنگ هەن لەسەر ئەوەی ئەگەری شەڕی گەورە لە ئێستادا بەلاوازی بهێڵنەوە. 

تێڕوانینی كوردی بۆ دۆخەكە

دابەشبوونی عێراقییەكان لەبەرامبەر مەترسییە چاوەڕوانكراوەكان و گواستنەوەی مەیدانی شەڕی ئیسرائیل و ئێران لە سوریاوە بۆ عێراق جۆرێك لە مەترسییان دروستكردووە لەسەر باری ئاسایش و پێكەوە هەڵكردنی هێزە سیاسییەكانی ناوەند بەتایبەت شیعەكان خۆیان. لەبارەی چۆنییەتی مامەڵەكردن لەگەڵ ئەم دۆخەش لە كوردستان بیروڕای جیاجیا هەیە، جارجار خۆشحاڵییەكی خۆڕسك و باو هەیە بە لاوازبوون و دروستبوونی كێشە لە ناوەند، ئەم دیدە پێیوایە لاوازی ناوەند بەمانای بەهێزبوونی پێگەی هەرێمە وەك ناوچەیەكی ئارام لە عێراقی شڵەژاو، لەبەرامبەریشدا ڕایەكی بەهێز هەیە پێیوایە ئاسایشی عێراق هی هەرێمەو بەپێچەوانەشەوە بەتایبەت لەسایەی حكومەتی عادل عەبدولمەهدی كە تاڕادەیەك نەرمە بەرامبەر هەرێمی كوردستان، جگە لەوەش تا ئێستا عێراق تاقە دەوڵەتە كە بەدەستور و یاسا دانی بەمافەكانی گەلی كورددا نابێت ئەگەرچی لە پراكتیشدا كێشەی زۆری هەبێت. لایەنگرانی ئەم بۆچوونە بەلایانەوە گرنگە هەرێم و بەغدا هاوکار و یەک بۆچوون بن لەسەر کۆڵەکەکانی پاراستنی ئاسایشیی نیشتمانی بە مانا فراوانەکەی، گرنگیشە كورد ئەم دەرفەتە بقۆزێتەوە بۆ ئەوەی كوردستان و هاریكاری و دۆستایەتی خۆی بۆ بەغدا دەربڕێت وەك پیشاندانی نیازچاكی بەتایبەت لەو كاتەی هەردوولا خەریكی دانوستانی چارەسەری پرسە هەڵواسراوەكانن و سەرەنجام ئەمەش ئەبێتە یارمەتیدەر لە راستكردنەوەی ئەو تێڕاوانینەی پێیوایە كورد تەنها بۆ بودجە بەغدایان دەوێت. جگە لەمەش بەمدواییانە هەندێ شیكارو بۆچوون باسیان لەوەكردووە كە كوردستان سەرچاوەی چاوساغی فڕۆكە ئیسرائیلییەكان بن، پێویستە ڕوون بكرێتەوە كە ئەوە هیچ بنەمایەكی زانستی نییەو زیاتر هەوڵی تێوە گلاندنە. 

پێدراوەكان ئاماژە بەوە دەكەن بەبێ بوونی سەقامگیری سیاسی، زەحمەتە کێشەکانی نێوان ھەرێم و بەغداد چارەسەربکرێت. هەروەها هەبوونی سەقامگیری بەتایبەتی لەم سەردەمەی حوكمڕانی عەبدولمەهدیدا بۆ کورد گرنگە. بەپێچەوانەوە لەحاڵەتی بەردەوامی تەقینەوە و ناسەقامگیریدا ڕەنگە عەبدولمەهدی ناچار بەدەستلەکارکێشانەوە بکرێ، خۆ ئەگەر دەستلەکاریش نەکێشێتەوە، ئەولەویەتی بۆ چارەسەرکردنی ئەو گرفتانە دەبێت، نەک گرفتەکانی نێوان بەغداد و ھەولێر، ئەمە جگە لەوەی ئێستادا بەغدا سەرچاوەیەكی سەرەكیی بژێوی کوردستانە و تێكچوونی ڕەوشەكەی مەترسییە بۆ سەر ئابووری كوردستان كە بەشی زۆری پشتی بەمووچە بەستووە. 

لەدوای ٢٠٠٣وە كێشەو گرفتی گەورە بەرۆكی عێراقیان گرتووە (قاعیدە، شەڕی تایفی، داعش.... هتد) لەسەرجەم ئەمانەشدا پەیكەری دەوڵەت هەر ماوەتەوە و مانەوەی عێراق خواستێكی نێودەوڵەتییە بۆیە واباشە کورد زۆر دڵی بە تێکچوونی دۆخەكە خۆشنەبێت، چونکە جگە لەوەی پریشکی ھەر شەڕ و توندوتیژی و ناسەقامگیرییەک، ئەویش دەگرێتەوە، لەهیچ قەیرانێكی عێراقدا كورد دەسكەوتی درێژخایەن و جێگیری بەدەستنەهێناوە.

جگە لە مەترسییەی شەڕی بەوەكالەت كە ئەگەر و هەوڵ بۆ تێپەڕاندنی هەیە لە ڕوانگەی درێژخایەن یان مامناوەندەوە داهاتویەکی ترسناك لە ئاسۆی عێراقدا هەیە و دەكرێت هەندێك لەوانە بەمجۆرە دیاریی بكرێت: 

_ نەوت لە چەند ساڵی ڕابوردودا گەشتە ترۆپکی خواست. بەو مانایە ئیتر لەوەودوا خواستی دونیا بۆ نەوت کەم دەکات و بەردەوام تەكنەلۆژیا گوشاری لەسەر دروست دەكات. ئەمەش ڕواستەوخۆ کاریگەری هەیە لە سەر هەرەسهێنانی نرخەكەی. شیكارەكان دەڵێن عێراق ئەگەر ئێستاش دەست پێبکات بە وەرچەرخان بۆ ئابوری بەدیل درەنگە. بەڵام نەک نایکات بەڵکو ناتوانێت.

_ دانیشتوانی عێراق بە ڕێژەیەکی زۆت زیاد دەکات کە دەبێتە هۆکاری دروستبونی چینی هەژاری بێ دەرامەتی زۆر و تەقینەوەی دانیشتوان كێشەی گەورەی بۆ دروست دەكات. 

_ کۆمەڵگای عێراقی هەڵئەوەشێت. موخەدەرات، ناوەندی هێزی جیاواز، تێکچون شیرازەی کۆمەڵایەتی، نەبونی شوناس، نەبونی حکومەتی بەهێز و لاوازی خزمەتگوزاری.

_ وڵاتانی دەوروبەری عێراق سیاسەتی تایبەتیان هەیە بەرامبەر عێراق ئەویش بە سودبینین لە سامانە سروشتیەکەی بەڕێگری لە گەشەی ئابوری بەدیل. 

_ گەندەڵی لەعێراق ژمارەی پێوانەیی تۆمار دەكات و سەرجەم ئەو رێوشوێنانەی دادەنرێن بۆ بەرگرتن لێی نەیتوانیوە سنورداری بكات. 
ئەگەریش قەرار بێت تێكچوون و نائارامی قەدەری عێراق بێت لە ماوەی مامناوەند و درێژدا ئەوە هەرێمی كوردستان تەنها ئەو كاتە دەتوانێت سودمەند بێت كە سوود لە هەڵەكانی ناوەند وەرگرێت؛ قەڵاچۆکردنی گەندەڵی دارایی و ئیداریی، یەکخستنی هێزی پێشمەرگە و ئاسایش، كەمكردنەوەی هەژموونی حزب و بەرپرسەکانی حزب لەناو حکومەتدا لەبەرژەوەندی عەقڵی دەوڵەتداری و نەبوونی پلان و ستراتیج بۆ پێشهاتەكان كورد دەخاتەوە بەردەم واقیعی ساڵانی ڕابردوو كە هەرێم تەنها بە کاردانەوە ڕۆژانە بارودۆخی بەرێئەکرد و تا ئێستا هیچی لەدۆخی خراپی عێراق نەچنیوەتەوەو كێشە هەڵواسراوەكانی هەر چاوەڕوانی چارەسەركردن دەكات. 

------
بەشداران:
ـ ستران عەبدوڵڵا
ـ سەردار عەزیز 
ـ سەرۆ قادر
ـ كاوە حەسەن 
ـ فەرهاد عەلادین 
ـ مەحمود ڕەزا
ـ مەهدی ئەبوبەكر
ـ نەوشیروان سەعید
ـ ئازاد چالاك 
ـ یاسین تەها


ئه‌م بابه‌ته ‌2914 جار خوێنراوه‌ته‌وه‌‌

PM:12:42:24/08/2019