شوان محەمەد، سەرنوسەری ماڵپەڕی "سپی میدیا" بە بڕیاری دادگا بڕی نۆ ملیۆن دینار قەرەبوو دەداتە ئیحسانی مەلا عەلی، كوڕی ڕابەری پێشووی بزووتنەوەی ئیسلامی و دەشڵێت " داواكەی دەستدرێژیە بۆ سەر ئازادی ڕۆژنامەگەری".
شوان محەمەد لە كۆنگرەیەكی ڕۆژنامەوانیدا كە لە ئۆفیسی سەرەكی "سپی میدیا" ئەنجامیدا ئاماژەی بۆ ئەوەكرد دە ساڵ لەمەوبەر و ئەو دەمەی سەرنوسەری ئاوێنە بووە چەند وێنەیەكی "نەشیاو"ی ئیحسانی مەلا عەلیان لە دۆخێكی نەشیاودا بڵاوكردۆتەوە.
ئەوەشی خستەڕوو بڵاوكردنەوەی ئەو وێنانە لە كاتێكدا بووە كە ئیحسانی مەلا عەلی و حزبەكەی هەموو ئازادیەكی كەسیان لە ناوچەی هەڵەبجە و هەورامان لە خەڵك قەدەغە كردبوو، بەڵام بۆ خۆیان لە گەشتەكانیان بۆ ئەوروپا بە زیادەوە مومارەسەیان دەكرد.
وتیشی "ناوبراو لە بەرامبەر بڵاوكردنەوەی وێنەكانی لە ڕۆژنامەی ئاوێنە داوای لەسەر تۆمار كردین و منیش بە سیفەتی سەرنوسەری پێشووی ئەو ڕۆژنامەیە چوومە بەردەم دادگا و بە بڕی نۆ ملیۆن دینار غرامە كراین".
جەختیشیكردەوە "ئەو داوایە دەستدرێژیە بۆ سەر ئازادی ڕۆژنامەگەی و بە نۆ ملیۆن دینار كەسایەتی ناوبراو ناگەڕێتەوە و وێنەكانیشی لە ئەرشیفی میدیاكاندا ناسڕێتەوە".