قائیمقامیەتی قەزای مەڵبەندی سلێمانی ڕایدەگەیەنێت لەپێناو پاراستنی تەندروستی خوێندكاران، لیژنە هاوبەشەكان بەبەردەوامی سەردانی ناوەندەكانی خوێندن دەكەن و چاودێری فرۆشگاكان دەكەن.
قائیمقامیەتی قەزای مەڵبەندی سلێمانی لە ڕاگەیەنراوێكدا كە وێنەیەكی دەست كوردیو كەوتووە ڕایگەیاند: قائیمقامی سلێمانی لیژنە هاوبەشەكانی قائیمقامیەتی راسپاردووە رۆژانە سەردانی فرۆشگای ناوەندەكانی خوێندن بكەن و پشكنین بۆ ئەو خواردن و خواردنەوانەی بە خوێندكاران دەفرۆشرێت ئەنجام بدەن ئەمەش لەپێناو پاراستنی تەندروستی خوێندكاران.
وتیشی: جێبەجێ كردنی مەرجەكانی تەندروستی یەكێكە لە بنەمانی كاركردن لە فرۆشگای قوتابخانەكاندا بۆیە پێویستە خاوەنەكانیان پابەندبن بەمەرجەكانی كاركردن بەپێچەوانەوە سزای شوێنەكە دەدرێت
ئاماژەی بەوەشكردووە: قوتابخانەكان پابەندن بەجێبەجێكردنی لیستی ئەو خواردن و خواردنەوانەی لەلایەن بەڕێوەبەرایەتی تەندروستی سلێمانیەوە ئامادەكراوە و رێگری لە فرۆشتنیان لەناوەندەكانی خوێندن دەكات كەلە (شیر و شەربەتی پاكەت، بنێشت، نوقڵ، لەفەی سورەكراو، هەموو جۆرەكانی چپس و خواردنەوە گازییەكان) پێكهاتوون.
ئەوەشیخستەڕوو: لیژنە هاوبەشەكانیان لەڕووی چاودێری بازرگانییەوە رێگری لەگرانفرۆشی لەناوەندەكانی خوێندن دەكات بەجۆرێك نابێت نرخی خواردەمەنیەكانی لەدەرەوەی فرۆشگای خوێندنگاكان زیاتر بێت.
هەروەها ڕاشیگەیاند: لەگەڵ چاودێری فرۆشگاكاندا لیژنەكان پشكنین بۆ تەنكیی ئاوی خووێندنگا و باخچەی منداڵان و دایەنگەكانیش دەكات، بۆیە پێویستە تانكی ئاوەكان سەربانی ناوەندەكانی خوێندن خاوێن كرابێتنەوە بۆئەوەی نەبێتە هۆی پیس بونی ئاوی خواردنەوەی قوتابخانەو باخچەكان.