ئەردۆغان: ئەمانەی تورك ناناسن لە داھاتوودا دەیناسن


ئەمڕۆ یەک شەممە ٢٠ی تشرینی یەکەمی ٢٠١٩ ڕەجەب تەیب ئەردۆغان، سەرۆک کۆماری تورکیا لە تازەترین لێدوانیدا ڕایگەیاند" ئەو بەڵێنانەی کە بە وڵاتەکەمان دراوە جێبەجێ نەکرێ ئەوا ھەروەکو پێشتریش درێژە بە ئۆپەراسیۆنەکەمان دەدەین". هاوکات دەشڵێت" ئەمانەی تورك ناناسن لە داھاتوودا دەیناسن".


سەرۆک کۆماری تورکیا راشیگەیاند: لە بەشێکی ناوچەی ئۆپەراسیۆنەکەماندا ھێزەکانی رژێمی لێیە کە رووسیا پارێزگارییان لێدەکات، لەگەڵ پوتین-دا بابەتەکە تاوتوێدەکەم، پێویستە چارەسەرێکی بۆ بدۆزینەوە.


ئەردۆغان ڕاشیدەگەیەنێت: ئەوانەی گەلی تورک ناناسن، لە داھاتوودا دەیناسن، یان بەڕێزەوە دەیناسن یان کە پەندەکانیان وەرگرت دەیناسن. 


ئەمەش لە کاتێکدایە دوێنێ شەممە ١٩ی تشرینی یەکەم ڕەجەب تەیب ئەردۆغان، سەرۆکی تورکیا لە نوێترین لێدوانیدا بەتوندی هه‌ڕه‌شه‌ی‌ ده‌ستپێكردنه‌وه‌ی‌ هێرش بۆسه‌ر باكووری‌ سوریا کرد و ڕایگەیاند" دانوستان لەگەڵ تیرۆریستان ناکەین". وه‌ك ئاماژه‌یه‌ك به‌ هێزه‌كانی‌ سوریای‌ دیموکرات "هەسەدە".


‌سەرۆکی تورکیا ئاماژەی بەوەشکرد" ڕۆژی سێشه‌ممه‌ ٢٢ی تشرینی یەکەمی ٢٠١٩ له‌ شاری‌ سوچی‌ له‌گه‌ڵ‌ ڤلادیمیر پوتین، سه‌رۆكی روسیا كۆده‌بمه‌وه، گه‌ر له‌ وتووێژه‌كانمان له‌گه‌ڵ‌ ڤلادیمیر پوتین له‌سه‌ر بڵاوبوونه‌وه‌ی‌ هێزه‌كانی‌ رژێمی‌ ئه‌سه‌د له‌ باكووری‌ سوریا نه‌گه‌یشتینه‌ رێككه‌وتن، پلانه‌كانی‌ خۆمان جێبه‌جێ‌ ده‌كه‌ین". 


ئەمە لە كاتێكدایە لەگەڵ دەستپێكردنی ئۆپەراسیۆنی سوپای توركیا بۆ سەر رۆژئاوای كوردستان لە ٩ی تشرینی یەکەمی ٢٠١٩، ئەمریكا بەشێكی ھێزەكانی لە باكووری سووریا و رۆژئاوای كوردستان كشاندەوە، كە ئەمەش وەك رێككەوتنی نێوان ترەمپ و ئەردۆغان ھەژمار دەكرێت و لە ناوخۆ و دەرەوەی ئەمریكا رەخنەی زۆر لە بڕیارەكەی ترەمپ دەگیرێت. 
 


ئه‌م بابه‌ته ‌1152 جار خوێنراوه‌ته‌وه‌‌

AM:09:17:20/10/2019