رێكخراوی لێبوردنی نێوده‌وڵه‌تی: تورکیا بەزۆر پەنابەران دەگەڕێنێتەوە بۆ ناوچەی ئارام

‌
رێكخراوی لێبوردنی نێوده‌وڵه‌تی، له‌ راپۆرتێكدا بڵاویکردەوە توركیا ده‌ستیكردووه‌ به‌ ده‌ركردنی په‌نابه‌رانی سووریا له‌سه‌ر خاكه‌كه‌ی و به‌ زۆر دەیانگەرێنێتەوە بۆ ناوچه‌كانی باكووری سووریا.

له‌ راپۆرته‌كه‌ی رێكخراوی لێبوردنی نێوده‌وڵه‌تی هاتووه‌: ناچاركردنی په‌نابه‌ران بۆ ئه‌وه‌ی بڕۆنه‌ ناوچه‌ی ململانێ و شه‌ڕه‌وه‌ بابه‌تێكی مه‌ترسیدار و نادادپه‌روه‌رانه‌یه‌.

ئەوەش خستۆتەڕوو "راپرسییه‌كانیش ده‌ریان خستووه‌، ئه‌و خه‌ڵكه‌ فێڵیان لێكراوه‌ یان ناچار كراوون بگه‌ڕێنه‌وه‌ بۆ ئه‌و ناوچه‌یه‌".

له‌ راپۆرته‌كه‌دا ئەوەش هاتووە: كه‌ په‌نابه‌ران به‌ رێكخراوه‌كه‌یان راگه‌یاندووه‌، پۆلیسی توركیا په‌لاماری داون و ئه‌شكه‌نجه‌ی داون و به‌ ناچاری واژووی پێكردوون گوایه‌ خۆیان داوای گه‌ڕانه‌وه‌یان كردووه‌.

ره‌جه‌ب ته‌یب ئه‌ردۆغان، سه‌رۆكی كۆماری توركیا، له‌ ده‌ستپێكی هێرشی سوپای وڵاته‌كه‌ی بۆ سه‌ر رۆژئاوای كوردستان رایگه‌یاند، ئامانجیانه‌ به‌ درێژایی 444 كیلۆمه‌تر و قوڵایی 32 كیلۆمه‌تر، نزیكه‌ی 2 ملیۆن په‌نابه‌ری سووریا، كه‌ ئێستا له‌ توركیان له‌و ناوچه‌یه‌ نیشته‌جێ بكات، ئەوەش بە گۆڕینی دیمۆگرافیای ناوچەکە لێک دەدرێتەوە.
 


PM:01:24:25/10/2019








ئەستێرەکان

Spee Media