بەگوێرەی زانیارییەکان کەمێک لەمەوپێش خۆپیشاندەران بینای پارێزگای "دیوانیە" یان لە باشووری عێراق سووتاند، هاوکات بارەگای حیزبی "دەعوە"یان لە شاری "نەجەف" سووتاند.
کۆمسیۆنی مافی مرۆفی عێراق ڕایگەیاند" تاکو ئێستا ٢١ خۆپیشاندەر و پۆلیس کوژراون و ١٧٧٩کەس لە هەردوولا برینداری جۆراو جۆر بە غاز و فیشەکە".
لەدرەنگانێکى شەوى رابردووەوە سەدان هاووڵاتى لە گۆڕەپانى تەحریر لە شارى بەغدا کۆبوونەوە وەک ئامادەکارییەک بۆ ئەنجامدانى خۆپیشاندانێکى بەرفراوان و ئەمڕۆش بە فراوانی خۆپیشاندان لەبەشێکی زۆری پارێزگاکانی عێراق بەڕێوەچوو.
هاوکات بەرەبەیانی ئەمڕۆش لە وتارێکدا سەرۆک وەزیرانی عێراق، عادل عبدولمەهدی رایگەیاند" پێشێلکاری بەرامبەر خۆپیشاندران قبووڵناکەن و رێگەنادەن هێرشبکرێتە سەر کەناڵەکانی راگەیاندن و دامەزراوەکانی دەوڵەت، لەگەڵ ئەوانەشدا خۆپیشاندان بە مافی رەوای هەموو هاووڵاتیانی عێراق دەزانێت".
سەرۆک وەزیرانی عێراق لە وتارەکەیدا دەشڵێت: مووچەی پلەباڵاکان بۆ نیوە کەمدەکەینەوە، ئاستی مووچەکان لێک نزیک دەکەینەوە، لەڕێگەی چەند پڕۆژەیەک هەلی کار دەڕەخسێنین و مووچەی ١٣٠ هەزار دیناری بۆ هەر بێکارێک دەبڕینەوە.