ویکلیکس چۆن باسی عەبدولڕەحمان قاسملۆ سەرکردەی رۆژهەڵات و حیزبی دیموکرات دەکات ؟

بەشی سێهەم..

 
ناچار بوون بارەگاکان بگوێزرێنەوە

 
١١- قاسملۆ نەیشاردەوە کە لە ماوەی دواییدا بەهۆی قەسفی خەستی ئێرانیەکانەوە ناچار بو بارەگاکانی بگوازێتەوە. بارەگاکانی پێشوتر،
لە سەر نەخشەیەک کە زۆر وردەکاری نەبو دەرکەوت نزیکن لە زابی بچوک کە دێتە ناو خاکی عێراقەوە ( نزیکەی 3601N 4520E )، لەوێ نەخۆشخانەیەکی گەورەیان هەبو کە پزیشکە فەرەنسیەکان هەمو مانگێک دەهاتن بۆ کارکردن، زۆرجار حزبی دیموکرات خراوەتە دۆخێکی نائاساییەوە گوایە لە هەمان کاتدا قوربانیەکانی تاڵەبانی و حکومەتی عێراق لەو نەخۆشخانەیە چارە دەکرێن. بارەگاکان بەرگەی دۆخەکەیان نەدەگرد، چونکە سوپای ئێران نزیک بو لە رۆژهەڵاتی شوێنەکە و سوپای عێراق نزیک لە رۆژئاوا و هێزەکانی تاڵەبانیش لە قوڵایی رۆژئاوا لە پشت عێراقیەکانەوە بوون ( هەریەک لێیان بۆ ئەوی تر خۆی مات دابو).


ئێستا بارەگاکان ٣٥ کیلۆمەتر بەرەو باکور نزیک لە سنوری ئێران گوازراونەتەوە (3620N 4515E)، قاسملۆ گوتیشی زۆربەی کاتەکان لە ناو خاکی ئێراندایە، سوپای عێراقیش لە بەری رۆژئاواوە لێیان دورە.

 

 
پێدەچێت لە ئێستادا بارەگاکانی لە ناوچەیەکی بێ خاوەن بێت و حزبی دیموکراتیش کۆنترۆڵی دەکات. قاسملۆ گوتی نەخۆشخانەکە دروست کراوەتەوە و پزیشکە فەرەنسیەکانیش بۆ کارکردن دێن. 
١٢- قاسملۆ گوتی ئامانجی ئێرانیەکان لە شەرەکانی ماوەت نزیک روباری کۆگەسور کە کەوتۆتە باشوری بارەگاکانی پێشوی بۆ پاککردنەوەی باڵی رۆژهەڵات- رۆژئاوای هێزەکانی تاڵەبانیە، راشیگەیاند کە بارەگاکانی تاڵەبانی کەوتونەتە رۆژهەڵاتی باشوری ماوەت ( لە شوێنێک  لە دۆڵی روباری شلێر کە لە گەڵ کۆگەسور لە باشوری ماوەت یەک دەگرنەوە، نزیک لە 3547N 4540E ).  ئێرانیەکان کۆنترۆڵی ئەو مەوقعە دەکەن کە دەروانێتە رۆژهەڵاتی ماوەت، عێراقیەکان کۆنترۆڵی گردەکانی رۆژئاوای باشوری ماوەت دەکەن، شەری زۆر لەو ناوچانە و لە شاخی رۆژئاوای ماوەت کە ئێرانیەکان بەشێکیان بەدەستەوەیە رویانداوە. 

 
هەر ئەو بەیانیە قاسملۆ لە بارەگاکەیەوە تەلەفۆنی بۆ کرا کە عێراقیەکان هەر ئەو ساتە هێرشێکی تازەیان بۆ سەر بنکەکانی ئێرانیەکان لە رۆژئاوای ماوەت دەست پێکردوە، قاسملۆ گوتی ماوەت وەک پێنجوین بە تەواوی چۆڵکراوە. 

 
پەیوەندیەکان لە گەڵ تاڵەبانی

 
١٣- قاسملۆ رایگەیاند کە " دۆستایەتیەکی زۆر باشی" لە گەڵ تاڵەبانی هەیە، بەمزوانە داوای لە تاڵەبانی کردوە کاڤیاری ئێرانی بۆ بهێنێت، کاتێک بۆی هێناوە تاڵەبانی بە سوعبەتەوە وتویەتی بە رێگەی تایبەتەوە بۆی سازکرا بری زیاتری کاڤیار لە رێگەپێدراو بهێنێت و ئەگەر دەسەڵاتەکانی ئێران بیانزانیە بۆ کێیە " لەوانەیە توشی شۆک ببونایە".
قاسملۆ نەیشاردەوە کە جار هەبوە بابەتی هەستیار نێوانیان رویداوە، بۆ نمونە، ماوەیەکی کورت پێش ئێستا ٥٢ سەربازی عێراقی، شەشیان ئەفسەر بون، پەنایان بۆ لای حزبی دیموکرات برد، تاڵەبانی داوای رادەستکرنیان بەخۆی کرد، ناکۆکیەکە بۆ دو هەفتە بەردەوام بو بەڵام قاسملۆ پێداگر بو لەوەی حزبی دیموکرات دەبێت لە سەرجەم بابەتەکانی نێوان عێراق و کوردەکانی عێراق بە " تەواوی بێلایەن بێت"، دواتر سەرباز و ئەفسەرەکانی رادەستی سوپای عێراق کرد. لە گەڵ ئەوەی قاسملۆ کەسێکی کراوەیە هاوکاتیش زۆر بە ئاگاییەوە وشەکانی بژاردە دەکات، حەزی نەکرد باس لە پەیوەندیەکانی لە گەڵ مسعود بارزانی بکات، بەڵام پێی وایە کە پدک ی بارزانی لە ئەرزی واقیعدا هیچکات حزب نەبوە، بەڵکو ئەوان زیاتر " عەشرەتێکن".

 
سەدام بەرپرسە

 
١٤- سەرەرای ئەوەی قاسملۆ رەغبەتی نەبو باسی دانیشتنەکەی لە گەڵ سەدام بکات نەشی دەویست بلێ شتێکی وا رویداوە ( هەرچەندە کە بە تەنیا بوە لە گەڵ باڵیۆزی سوید کراوەتر بوە).
قاسملۆ باسی پەندێکی فارسی کرد، دەڵێت: " ئەگەر بتوانی خوا ببینت هیچ پێویست ناکات خۆت بە یەکێک لە دوازدە ئیمامەکە گرێبدەیت).
قاسملۆ بە پێچەوانەی رەجاوی سەرکردەی موجاهدینی خەلق بە " هیچ شێوەیەک نایەوێت" لە گەڵ سەدام وێنەی بگیرێت و تەنانەت سەردانەکەی بۆ بەغدا و چاوپێکەوتنی سەدام لە میدیاکاندا باس بکرێت، لە ئێران هەواڵی لەوجۆرە بەباش نابینرێت. بەرپرسی بەشی سیاسی فشاری خستە سەر قاسملۆ کێ لە عێراق بەرپرسی پرسی کوردە، قاسملۆ گوتی " سەدام ". ئەو بەرپرسی ورد و درشتی ئەو پرسەیە، هەروەها لە کاروباری رۆژ بە رۆژیشدا. لە عێراق سێ کەس زۆر گرنگن: " سەدام، عەدنان خیراللە – وەزیری بەرگری و ئامۆزا و برای هاوسەری سەدام – بەرپرسە لە باشور و علی حسن المجید، ئامۆزا بەرپرسە لە باکور. قاسملۆ وتی ئەو علی حسن، کە زۆرجار لە بارەگاکەی لە کەرکوکە، نەبینیوە. پێدەچێت قاسملۆ کەمتر لە خوا خۆی بە کەسەوە گرێ نادات.

 
وێرانکردنی گوندەکان

 
١٥- بەرپرسی بەشی سیاسی پرسیاری لە قاسملۆ دەرباری کامپینی عێراقی بۆ وێرانکردنی گوندەکانی کوردستان کرد، قاسملۆ گوتی کە "زۆربەی" گوندەکان روخێنراون، لەم خاڵەدا هەست بە هەڵچونی دەرونی ئەو نەکرا. بەرپرسەکە لێی پرسی ئایا ئەمە کاریگەری لەسەر زیادبونی ژمارەی گەرێڵا و پەنابەران نەکردوە، لە وەڵامدا گوتی تا رادەیەکی زۆر ژمارەی گەرێڵاکانی زیاد کردوە، بەڵام نە خۆی و نە تاڵەبانیش هانی بیرۆکەی رۆیشتنی پەناباران بۆ ناوچەکانی تر ناکەن بەهۆی کێشە و بەربەستی گەورە بۆ دابینکردن خۆراک بۆیان و خزمەتگوزاریەکانی تر.   

 
قاسملۆ رایگەیاند کە کاریگەری راستەوخۆی کامپینی عێراق بۆ روخاندنی گوندەکان لەناوبردنی تەواوی ژیانی تەقلیدی کشتوکاڵیە. کورد لە عێراق تەنها دو بژاردەی لە بەردەمدایە، رو لە شارەکان بکات یاخود بمێنێتەوە:

 
لە سەنتەرە تازە دروستراوەکان تەنها وەسیلەی ژیان جاشایەتیە. قاسملۆ گوتی ئێرانیەکان تا ئێستا ٢٥ گوندیان لە کۆی گشتی حەوت هەزار گوند لە کوردستانی ئێران روخاندوە ( ژمارەی کوردی لە ئێران بە حەوت ملیۆن مەزەندە کرد)، کۆمێنتێکیشی دا: " بەداخەوە هەر لایەنێک نیەتی هەیە عادەت و رەفتاری خراپی لایەنەکەی تر فێربێت"، گوتی یەکێک لەو عادەتە خراپانەی کە ئێرانیەکان هەیانە بەکارهێنانی چەکی کیمیاویە". " هەر دولا بەکاریان هێناوە، عێراقیەکان زۆرتر".  
بەرپرسی بەشی سیاسی لێی پرسی بە هۆی زۆری دەشت لە سروشتی کوردستان ئایا پەلامارەکانی هێلیکۆپتەر و هێزە ئاسمانیەکانی تر  کێشەی گەورەیان بۆ پێشمەرگە دروستکردوە؟  قاسملۆ گوتی: " نە ئێمە و نە کوردەکانی عێراق مەراقی هێلیکۆپتەرمان نیە، دەتوانین لەو بوارەدا ئاگامان لە خۆمان بێت، ئەوەی کێشەی جدیە بۆمان قەسفی مەدفەعیە و زیاتریش لە گەڵ چەکە کیمیاویەکان".   
ماویەتی...

 


ئه‌م بابه‌ته ‌2076 جار خوێنراوه‌ته‌وه‌‌

PM:11:21:06/12/2019