دوو هەفتەیە بەرپرسێکی کورد دیار نەماوە

"حسێن خدر" به‌ڕێوه‌به‌ری په‌روه‌رده‌ی شنگال سه‌ر به‌ حكومه‌تی هه‌رێمی كوردستان، دوو هەفتە زیاترە ده‌وامی نه‌كردووه‌ و له‌ جێی ئه‌و، كه‌سێكی به‌ كاتی كاره‌كان به‌ڕێوه‌ده‌بات.
 
یاسین خه‌ڵه‌ف، كه ‌ئێستا كاره‌كانی به‌ڕێوه‌به‌رایه‌تی په‌روه‌رده‌ی شنگال به‌كاتی به‌ڕێوه‌ده‌بات به‌ ماڵپەڕی (كه‌ركوك ناو)ی راگەیاندووە، "دوو هه‌فته‌یه‌ هیچ په‌یوه‌ندییه‌كی ته‌له‌فۆنی له‌نێوان من و به‌ڕێوه‌به‌ری په‌روه‌ردەدا نه‌بووه‌، ‌نازانین بۆ چ شوێنێك رۆیشتووه‌ یاخود بۆ ناگه‌ڕێته‌وه‌ سه‌ر كاره‌كه‌ی، ته‌نیا ئه‌وه‌نده‌ ده‌زانم پێش وه‌رگرتنی مۆڵه‌ت وتی بۆ نه‌شته‌رگه‌ری فه‌قه‌رات ده‌چێته‌ هه‌ولێر".
 
به‌ڕێوه‌به‌ری په‌روه‌رده‌، له‌ 19ی تشرینی دوه‌می ئه‌مساڵ بۆ پێنج رۆژ مۆڵه‌تی وه‌رگرتووه‌، به‌ڵام دوای ئه‌و ماوه‌یه‌ به‌بێ هیچ رونكردنه‌وه‌ و ئاگاداركردنه‌وه‌ی لێپرسراوانی تری به‌ڕێوه‌به‌رایه‌تییه‌كه‌، نه‌گه‌ڕاوه‌ته‌وه‌ بۆ ده‌وام و هیچ هه‌واڵێكی نییه‌.


هاوکات عومه‌ر عه‌لی، به‌ڕێوه‌به‌ری گشتی په‌روه‌رده‌ی دهۆك به ماڵپەڕی‌ ( كه‌ركوك ناو )ی راگەیاندووە "راسته‌ به‌رێوه‌به‌ری په‌روه‌رده‌ی شنگال له‌ ده‌وام دابڕاوه‌، به‌ڵام هێشتا هیچ رێكارێكی یاساییمان له‌ دژی نه‌گرتۆته‌به‌ر و ماوه‌یه‌كی تر چاوه‌ڕێ ده‌كه‌ن، ئه‌گه‌ر هه‌ر نه‌گه‌ڕایه‌وه‌، ئه‌وا كه‌سێكی تر له‌ پۆسته‌كه‌ داده‌نێین".
 
 
په‌روه‌رده‌ی كوردی شنگال، سه‌رپه‌رشتی 57 خوێندنگه‌ی قۆناغه‌كانی سه‌ره‌تایی، ناوه‌ندی و دواناوه‌ندی ده‌كات له‌گه‌ڵ چوار خوێندنگه‌ی خوێندنی خێرا، هه‌موو فه‌رمانبه‌رانی به‌ڕێوه‌به‌رایه‌تییه‌كه‌ش له‌ قه‌زای سێمێل سه‌ر به‌ پارێزگای دهۆك ده‌وامده‌كه‌ن.
 


AM:11:35:14/12/2019