رۆشنبیری ناسراو مەریوانی وریا قانع لە نوێترین نووسینیدا دەڵێت" ھیچ ڕووبەرێک لە کوردستاندا ھێندەی ئەو ڕووبەرە میدیای بۆگەن و بێمانا و بێدەربەست نەکراوە، کە لە دوای کەوتنی ڕژێمەکەی سەدام حوسەینەوە دروستکراوە".
د. مەریوان قانع لە نووسینێکدا بەناونیشانی" میدیای کوردیی: لە وێرانەوە بۆ وێرانترین" وتی" بەشی ھەرە زۆری ئەم میدیایە میدیایەکی کڕدراوە، خاوەنەکانیان یان حیزبە، یان کۆمەڵێک سیاسیی گەندەڵ و نابەپرسیارە، یاخود ژمارەیەک سەرمایەدارن کە دەزگا میدیاکانیان وەک سەکۆی ماڵەکانی خۆیان مامەڵەدەکەن".
لە بەشێکی تری نوسینەکەیدا ناوبراو دەشڵێت" زۆرینەی ئەوانی تریشیان سێبەری ناشیرینیی ئەو کەسایەتییە سیاسیی و کۆمپانیاکانیان و ئەو سەرمایەدارانەن کە سپۆنسەریان دەکەن".
د. مەریوان قانع ڕاشیگەیاند" ژمارەی ئەو سایت و پەیج و دەزگا میدیایانەی لەم دۆخە خنکێەنەردا لانی کەمی سەربەخۆییان تێدایە و بە بەرپرسیاریەتییەوە کاردەکەن، لە ژمارەی پەنجەکانی یەک دەست کەمترە".
جەختیشیکردەوە: پێدەچێت دەسەڵاتدارانی ھەرێم، بە تیپی پێنجەمی ئەو دەسەڵاتەوە کە پەرلەمانی کوردستانە، ئەو چەند دەزگا و سایتە کەمە بە زیاد بزانن و بیانەوێت دەمکوتیان کەن.
مەریوان وریا قانع لەدایک بووی ساڵی ١٩٦١ لە شاری سلێمانی، مەریوان نووسەر و ڕەخنەگرە لە زانستی سیاسیەکان ، لەساڵی ١٩٩٣ چۆتە ھۆڵەندا ھەرلەوێش زانکۆی تەواو کردووە.
دەقی وتارەکە لەم لینکەوە بخوێنرەوە..