ئەمڕۆ ساڵوەگەڕی كۆچی دوایی هونەرمەندی گەورەی كورد محەمەدی ماملێیە

ئەمڕۆ ٢٣ی كانوونی دووەمی ٢٠٢٠ ساڵوەگەڕی كۆچی دوایی هونەرمەندی گەورەی كورد محەمەدی ماملێیە.

 

محەمەدی ماملێ كوڕی میرزا سەعیدی ماملێ"مام عەلی"لە ساڵی ١٩٢٥ له بنەماڵەیەكی پیشەكا‌ر، هونەرمەند و نیشتمانپەروەر لە گەڕەكی هەرمەنییانی شاری مهاباد لە دایكبووە.

 

 میرزا سەعیدی باوكی هەرچەند نەخوێندەوار بووە، بەڵام بە هۆی هونەری دەنگخۆشی و مەقامزانی و شیعرخوێنی"بەتایبەت وەفایی" لە كۆڕ و كۆزیلكەی عارفانەی خانەقای شەمزینان، ڕێزێكی زۆری لێگیراوە و لە گەڕەك و دەر و بازاڕ بە میرزا ناوی براوە هەروەك لە زۆر كەسی بەتەمەنی ناوچەی موكریان بیستراوە، سەعیدی ماملێ لە‌گەڵ هونەرمەند"سەیید عەلی ئەسغەری كوردستانی"١٨٨٢-١٩٣٧"، كە له ساڵی 1932دا هاتووەتە موكریان و لە باخی "میرزا شەریفی حاجی ڕەشید" بۆ خەڵكی مهاباد گۆرانی گوتووە، بەشدار بووە.

 

ماملێ، هەر لە منداڵییەوە وەك تەواوی ئەندامانی بنەماڵەكەی بەهرەی دەنگخۆشی تێدا دەركەوتووە و تەمەنێكی دوور و درێژی لەو پێناوەدا بەسەر بردووە، تا لە دوا چركەكانی تەمەنیدا و لە ڕۆژی ٢٣ ی كانوونی دووەمی ساڵی ١٩٩٩ بەهۆی نەخۆشیەوە كۆچی دواییكرد.

 

محەمەد ماملێ، لە ساڵی ١٩٣٨ی زایینی یەكەم بەرهەمی گۆرانی بەفەرمی تۆماركرد بە ناوی "ڕۆیی بە جێیهێشتم".

 

 

 



ئه‌م بابه‌ته ‌1088 جار خوێنراوه‌ته‌وه‌‌

PM:04:16:23/01/2020