پۆلیسی هەولێر ڕایگەیاند" ڤیدۆی کەوتنی کەسێک لەسەر شەقام بەهۆی کۆرۆناوە دورە لە ڕاستییەوە".
دوای بڵاوبونەوەی گرتەیەكی ڤیدیۆیی لە تۆڕەكۆمەڵایەتیەكاندا، كە تیایدا دەردەكەوێت كەسێك لە زەویدا كەوتووە و هیچ كەسێك بە فریایەوە ناچێت، پۆلیسی هەولێر رایگەیاند" ئەو كەسەی لە ڤیدیۆیەكەدا دەردەكەوێت نەخۆشییەكی ئاسایی هەبووە و لەوكاتەدا لەو جێگایەدا بووراوەتەوە و پەیوەندەی بە كۆرۆناوە نەبووە".
پۆلیس ئەوەی رونكردووەتەوە" بە فەرمانی بەڕێوەبەری پۆلیسی پارێزگای هەولێر تیمێكی لێكۆڵینەوە بەدواداچوونی وردی كردووە و دەركەوتووە كەوا ئەو كەسەی لە ڤیدیۆكەدا دەردەكەوێت، نەخۆشییەكی ئاسایی ھەبووە و بە كۆرۆناوە نەبووە."
پۆلیس دوای لێكۆڵینەوەكانی رایگەیاندووە" ئەو دوو كەسەش كە ڤیدیۆكەیان بڵاوكردووەتەوە، بە بڕیاری دادوەر و بەپێی ماددەی ٢٤٠ لە یاسای سزادان، لەلایەن پۆلیسەوە دەستگیركراون و رەوانەی دادگا كراون."
پێشتر پۆلیسی هەولێر هۆشداری دابوو بە هاوڵاتیان كە سیناریۆ و ڤیدیۆی دروستكرا و بڵاو نەكەنەوە لەبەر ئەوەی رووبەڕوی یاسا دەكرێنەوە.