فراكسیۆنی پارتی له‌باره‌ی ده‌نگۆی بردنه‌ده‌ره‌وه‌ی پاره‌ داوایه‌ك ئاراستەی حكومه‌تی هەرێم ده‌كات

‌
فراكسیۆنی پارتی له‌باره‌ی ده‌نگۆی بردنه‌ده‌ره‌وه‌ی پاره‌ داوایه‌ك ئاراستەی حكومه‌تی هەرێم و داواکاری گشتی ده‌كات و دەڵێت" پێویستە بۆ ساخکردنەوەی ئەم بابەتە ڕێوشوێنی پێوست بگرنە بەر".
 
لە بەیاننامەیەکدا فراکسیۆنی پارتی لە پەرلەمانی کوردستان بڵاویکردەوە، ماوەیەکە باس لە بردنە ده‌ره‌وه‌ی شەش ملیار دۆلار دەکرێت لەلایەن کۆمپانیایەکەوە بۆ بانکێکی ئەوروپا، ئێمە لە فراکسیۆنی پارتی داوا لە حکوومەتی هەرێمی کوردستان و داواکاری گشتی دەکەین بۆ ساخکردنەوەی ئەم بابەتە ڕێوشوێنی پێویست بگرنەبەر.

ئاماژەی بەوەشکردووە" هەر لایەنێکیش لەسەر ئەم پرسە بەڵگەی هەیە بەڵگەکانی پێشکەش بە لایەنی پەیوەندیدار بکات و بەرچاو ڕوونی بدرێتە خەڵکی کوردستان، بۆ ئەوەی ڕوونبێتەوە ئایا ئەم بابەتە دروستە یان نا چوونکە ئەوەی هەیە تا ئێستا قسەیەو پاڵپشتی هەنگاوی کردەیی دەکەین لەم بابەتەدا".

هاوکات لە کۆتایی بەیانەکەدا فراكسیۆنی پارتی لە پەرلەمانی کوردستان دڵنیایی ده‌ده‌نه‌ خه‌ڵکی کوردستان، کە به‌رمه‌بنای کارنامه‌ی پارتی و هه‌نگاوه‌کانی حکومه‌تی هه‌رێمی کوردستان له‌پێناو چاکسازی و شه‌فافیه‌ت و ڕاستی، به‌هیچ جۆرێک سازش له‌سه‌ر مه‌بادئه‌کانی خۆیان ناکه‌ن و له‌گه‌ڵ خه‌ڵکی کوردستان ڕاستگۆ ده‌بن و نوێنه‌رایه‌تی خواسته‌کانیان ده‌که‌ن.


فراکسیۆنی پارتی لە پەرلەمانی کوردستان

AM:12:10:18/05/2020








ئەستێرەکان

Spee Media