ژووری ئۆپراسیۆنەكانی راپەڕین پێنج بڕیاری نوێی دەرکرد
ژووری ئۆپراسیۆنەكانی راپەڕین راگەیەنراوێكیان لەسەر رێنماییەكانی بەڕەنگاربوونەوەی ڤایرۆسی كۆرۆنا بڵاوكردەوە.
لەراگەیەنراوەكەی ژووری ئۆپراسیۆنەكانی راپەڕیندا هاتووە، بەهۆی تەوژمی بێبەزەییانە و توندی ئەمجارەی ڤایرۆسی كۆرۆنا و سەرلەنوێ سەرهەڵدانەوەی ئەم نەخۆشیە لە هەرێمی كوردستان و مەترسیەكانی لەسەر ژیان و تەندروستی هاوڵاتیان ئەمڕۆ دوشەممە كۆبونەوەی ژوری ئۆپراسیۆن بەمەبەستی جێبەجێكردنی ناوەڕۆكی بەیانی ژمارە 38ی وەزارەتی ناوخۆی حكومەتی هەرێمی كوردستان بەڕێوەچو، بڕیاردراوە
یەكەم: داخستنی سەرجەم دوكان و بازار و عیادە و نۆڕینگەی پزیشكی و تێكڕای ئەو شوێنانەی لە بەیانەكەدا ناویان هاتوە، جگە لە دەرمانخانەی ئێشكگر و نانەوا خانەكان.
دوەم: هەمو چەشنە هاتوچۆكردنێك لە نێوان ئیدارەی ڕاپەڕین و سەرجەم پارێزگا و ئیدارەكانی تری هەرێمی كوردستان قەدەغەیە، جگە لە تیمەكانی تەندروستی و هێزە ئەمنیەكان و كارمەندانی گومرگ و راگەیاندن و جوڵەی بازرگانی و سوتەمەنی.
سێیەم: هاتوچۆی نێوان سەرجەم شارو شارۆچكە و یەكە كارگێڕیەكانی ئیدارەی راپەڕین قەدەغەیە جگە لەوانەی لە بڕگەی دوەمی ئەم ڕاگەیەنراوە ئاماژەی پێكراوە.
چوارەم: دەستپێكردنی هەڵمەتی هۆشیاركردنەوە و ئاگاداركردنەوەی هاوڵاتیان لە مەترسیەكانی ئەم نەخۆشیە و زەرورەتی مانەوەیان لەماڵەوە و داخستنی دوكان و بازاڕ و پابەندبونیان بە بڕیاری قەدەغەی هاتوچۆی پیادە و ئۆتۆمبێل لەلایەن تیمی هۆشیاری هاوبەشی و تەندروستی و ئاسایش و پۆلیس و هاتوچۆ.
پێنجەم: بەردەوامبونی خزمەتگوزاریە بنەڕەتیەكان (ئاو، كارەبا، تەندرووستی، پاككرنەوە)، بەڕێوەبەرایەتیەكان رێكاری پێویست دەگرنەبەر.
PM:06:58:01/06/2020