ئەمڕۆ دووشەممە بۆ ڕۆژی شەشەم لەسەر یەک خۆپیشاندانی بەشێک لە هاوڵاتیانی قەزای رانیە بەردەوامەو خۆپیشاندەران لە ١٤ خاڵدا داواکارییەکانیان کۆکردووەتەوە، کە گرنگترینیان دورخستنەوە چەن بەرپرسێکی مەدەنی و سەربازیی ئیدارەی ڕاپەڕینە. 

خۆپیشاندەرانی ڕانیە لە ڕاگەیەندراوێکدا کە وێنەیەکی دەست "سپی" کەوتووە، ئاماژە بەوەدەکەن، بەكورتی بەچەند خاڵێك داوا و خواستی خەڵكی ڕانیە بڵاودەكەینەوە بۆ ئەوەی هەموو كەس بزانێت ئێمە چیمان دەوێت و چیمان پێویستە كەچەند ڕؤژێكە لەسەر شەقامین

لە ڕاگەیەندراوەکەدا داواکاریی خۆپیشاندەرانی ڕانیە لەم چەند خاڵەدا خراوەتە ڕوو:

١- دوورخستنەوە و سزادانی سەرپەرشتیاری ئیدارەی ڕاپەڕین چونكە لەكاتێكدا خۆپیشاندان دەستی پێكرد ئەو مۆڵەتی كردووە و ڕۆیشتۆتەوە بۆ ماڵەوە،.

٢- دوورخستنەوە و سزادان و دادگایی كردنی ئەو بەرپرسانەی مەلەفی گەندەڵیان هەیە و سامانی گشتیان بەفیڕۆداوە،.

٣- دوورخستنەوە سەرجەم بارەگای پارتە سیاسیەكان و بنكەكانی پۆلیس لەسەنتەری شار.

٤- كردنەوەی چەند كارگەیەكی بەرهەمهێنان بەمەبەستی دابینكردنی هەلی كار بەبێ‌ جیاوازی بۆ گەنجانی ڕانیە،.

٥- گێڕانەوەی سەرجەم زەویەكانی موڵكی گشتی كەلەلایەن كەسانی دەستڕۆیشتوو دەستیان بەسەرداگیراوە،.

٦- داواكارین یەكێتی فشاربخاتە سەرحكومەتی هەرێم بۆ ئەوەی هەرچی زووتر لەگەڵ بەغدا ڕێككەوتن بكات بەمەبەستی دابینكردنی شایشتە داراییەكانی موچەخۆرانی هەرێم،.

٧- داوا لەهاوسەرۆكایەتی یەكێتی و مەكتەبی سیاسی یەكێتی دەكەین بەرپرسی مەڵبەند و كۆمیتە لەكاردووربخاتەوە و كەسانی شیاو و جەماوەری بۆ ئەم پۆستانە دەست نیشان بكات،.

٨- داوا لەفەرماندەی هێزەكانی 70ی یەكێتی دەكەین سەرجەم ئەو بەرپرسە سەربازییانە سزابدات كەدەستیان هەبووە لەپەلاماردانی خۆپیشاندەران،.

٩- داوا دەكەین لەدیاری كردنی بەرپرسانی ئیداری و سیاسی و سەربازی پرس و ڕاوێژ بەخەڵكی ڕانیە بكرێت چونكە مێژوو شاهیدە ملازم موحسین جورئەتی نەكرد لەڕانیە حكوم بكات ئیتر ڕانیە دەرفەت بەكەسانی خۆسەپێن نادات،.

١٠ – داوا دەكەین بەرپرسانی ئاسایش و پۆلیس وێڕای داوای لێبوردن لەخۆپیشاندەران لەكار دووربخرێنەوە و سزابدرێن چونكە لەئاست پاراستنی گیانی ئێمەی خۆپیشاندەردا نەبوون و نەیانتوانی گوێ بۆ داواكاریەكانمان بگرن و پارێزگاریمان لێبكەن.

١١- داوا دەكەین بودجەیەكی تایبەت بۆ پڕۆژە تەواونەكراوەكانی ئیدارەی ڕاپەڕین تەرخان بكرێت،.

١٢- داواكارین لەهەركاتێك هەرچین و توێژێكی ڕانیە بۆ هەر مەبەستێك خۆپیشاندانی كرد تەنیا پۆلیسی چالاكیەمەدەنیەكان لەوێ‌ ئامادەبێت و بەهیچ شێوەیەك هیچ هێزێكی ترمان قبوڵ نیە.

١٣- داوا لەسەرجەم پەرلەمانتارانی كوردستان و عێراقی سەرجەم لایەنە سیاسیەكان دەكەین ڕۆژانی داهاتوو بێنە ناوبازاڕ و گوێ بۆ دەنگی دەنگدەرەكانیان بگرن،.

١٤- پێویست ناكات بەرپرسانی ئیدارەی ڕاپەڕین بەدوای سەرپەرشتیار و نوێنەری خۆپیشاندەران دا بگەڕێن بەڵكو پێویستە سەرجەم ئەو خاڵانەی لەسەرەوە ئاماژەیان پێكراوە جێبەجێبكرێن ئەوكاتە ڕۆڵە ئازا و قارەمانەكانی ڕانیە شەقام چۆل دەكەن.