سه‌رۆكی فراكسیۆنی یه‌كگرتوو له په‌رله‌مانی كوردستان ڕایدەگەیەنێت" حكومەتی هەرێم دەیەوێت لە 21% لە موچەی بنەڕەتی فەرمانبەران ببڕێت و ناویشی دەنێت چاكسازی".
ئه‌مرۆ سێشه‌ممه ١٥ی ئەیلولی ٢٠٢٠ د.شێركۆ جه‌وده‌ت سه‌رۆكی فراكسیۆنی یه‌كگرتوو له په‌رله‌مانی كوردستان و هاوكات ئه‌ندامی لیژنه‌ی دارایی په‌رله‌مان به میدیای حیزبه‌كه‌ی راگه‌یاند" مەترسییەكی دیكەی گەورە خەریكە ڕووبەڕووری مووچەخۆرانی هەرێمی كوردستان دەبێتەوە".
شێورکۆ جەودەت ڕاشیگەیاند" حكومەتی هەرێمی كوردستان بەنیازە لە 21% مووچەی بنەڕەتی فەرمانبەران ببڕێت كە ئەمەش فێڵێكی دیكەی حكومەتی هەرێمە بۆ زیاتر بڕینی مووچەی فەرمانبەران".
ئاشكراشیكرد: هەنگاوی دووەمی هەنگاوەكانی حكومەت دەیەوێت بە یاسای چاكسازی دەستكاری دەرماڵەكانیش بكات كە ئەوەش ڕێژەی دەستكارییەكە بەرزتر دەبێتەوە، بەڵام لە ڕووكەشدا ناوی دەنێت چاكسازی و بەو هۆیەشەوە لێبڕین بەرزتر دەكاتەوە نەك ئەوەی كەمی بكاتەوە.
سه‌رۆكی فراكسیۆنی یه‌كگرتوو ڕوونیشیكردەوە: وەك فراكسیۆنی یەكگرتوو بەردەوام دەبن لە داكۆكیكردن لە مافی فەرمانبەران و مووچەخۆرانی هەرێمی كوردستان، چونكە ناكرێت حكومەت بە ئارەزووی خۆی و بۆ هەر مانگێك بڕە پارەیەك لە مووچەخۆران ببڕێت.