شاری پزیشکی فاروق ڕایده‌گه‌یه‌نێت" د. جەمال ساڵح عەبدولڕەحمان پاش ململانێیەکی زۆر لەگەڵ پەتایی کۆرۆنادا گیانی لەدەستدا".
شاری پزیشکی فاروق لە ڕاگەیەنراوێکدا بڵاویکردەوە، نیوەڕۆی ئەمڕۆ (سێشەممە١٧ى تشرینی دووەمی ٢٠٢٠) ، د. جەمال ساڵح عەبدولڕەحمان کۆچی دوایی کرد پاش ململانێیەکی زۆر لەگەڵ ڤایرۆسی کۆرۆنا-دا، دکتۆر جەمال، لە ساڵی ١٩٤٦ لە شاری سلێمانی لە دایکبووە، پاش خوێندنی دوا ناوەندی، دەچێت بۆ کۆلێژی پزیشکیی لە موسڵ و لە ساڵی ١٩٧٠ خوێندن تەواو دەکات، و دواتر دەچێت بۆ کۆلێژی پزیشکیی لە زانکۆی لەندەن لە ولاتی بەریتانیا بە مەبەستی درێژەدان بە خوێندنەکەی و بەدەست هێنانی بڕوانامەی پسپۆڕێتی لە بواری نەخۆشییەکانی هەناوی-دا.
لە ڕاگەیەندراوەکەدا ئەوەش هاتووە" دکتۆر جەمال یەکەم ڕاگری کۆلێژی پزیشکیی بووە لە زانکۆی سلێمانی لە نێوان ساڵی ١٩٩١ تا ١٩٩٦، و وەک ماموستای وانەبێژی لەوێ کاری کردووە. وە لە بەرواری ١٢/٧/٢٠١٩ دەستی بە کارکردن کردووە لە شاری پزیشکیی فاروق، وەک پسپۆڕی نەخۆشییەکانی هەناوی".