پەرلەمانتارە ناڕازییەكانی كوردستان لەبارەی دواخستنی كۆبوونەوەی سبەینێی پەڕلەمان، كە تایبەت كرابوو بە بانگهێشتكردنی حكومەت لەسەر مووچە هۆشداری بە سەرۆكایەتی پەڕلەمان و حکومەت دەدەن و ڕایدەگەیەنن" هەموو ئەگەرەكان لەبەردەممان دا كراوە دەبن".
ئه‌مڕۆ سێشەممە پەرلەمانتارە ناڕازییەكانی كوردستان لە ڕاگەیەنراوێكدا کەوێنەیەکی دەست (سپی) كه‌وتووه ئاماژە بەوەدەكەن، ئێمەی ئەندامانی ناڕازیی لە پەرلەمانی کوردستان، کە لە دانیشتنەکەی رۆژی ٣٠/ ١١/ ٢٠٢٠دا، هەڵوێستمان دەربڕیی و پێداگریمان کرد لەسەر بانگێشتکردنی حکومەت بۆ پەرلەمان و چارەسەرکردنی کێشەی موچەخۆرانی هەرێمی کوردستان، دژی بڕیاری هەڵوەشاندنەوەی کۆبونەوەکەی سبەینێی پەرلەمان-ین، کە دەبو حکومەت بهێنرێتە پەرلەمان و پرسی چارەسەرکردنی موچە و ناکۆکیی هەرێم و بەغداد لەسەر نەوت و داهاتی خاڵە سنورییەکان یەکلابکرانایەتەوە، بۆ ئەوەی چیتر هاونیشتمانیان و موچەخۆران نەکرێنە قوربانیی سیاسەتی چەوتی حکومەتی هەرێم.
ئەو پەرلەمانتارانە راشیانگەیاندووە" ئێمەی ناڕازیی لە پەرلەمان، بەڵێن بە خەڵکی جوامێری کورستان دەدەین کە سورین لەسەر هەڵوێستەکانمان و داکۆکیکردن لە مافە رەواکانیان و هۆشداریش دەدەینە دەستەی سەرۆکایەتیی پەرلەمان، کە ناکرێت چیتر خەمساردبێت لە ئەنجامدانی دانیشتنی پەرلەمان بۆ چارەسەرکردنی پرسی موچە و تەرخانکردنی دانیشتنەکانی پەرلەمان بۆ بابەتی لابەلا، بە پێچەوانەوە هەمو رێگایەکی یاسایی و ناڕەزایی پەرلەمانیی و مەدەنیی دەگرینە بەر و بۆ داهاتویش، هەمو ئەگەرەکان لەبەردەممان دا کراوە دەبن".