aso
سەردەمی ناماقوڵی ..
هونەر تۆفیق
بەپێ ی پێوەرەکانی عەقڵ هیچکام لەم قسانەی خوارەوە ماقوڵ نین :
فیلێک بەدەم فڕینەوە گۆرانی دەڵێت .
 پیاوێک لەگەڵ خواردنەوەی پەرداخێک شەربەتی ئەستێرەدا فو لەخۆردەکات..
مێرولەیەک بەدەم پژمەوە غەواسەیەکی ئەتۆمی  لەژێر دەریاکەدا دەتەقێنێتەوە ..
ژنێک بەسەر پەڵە هەورێکەوە خەوی لێکەوتووە و  دەڕوات بۆ دورگەی واق واق لەچین..
 مرۆڤ لەم سەردەمەدا بەکردەو بژاردەی خودی خۆی ، داکەوتی ناماقوڵ دروست دەکات و هەوڵی هێنانەدی دەدات . قبوڵکردنی ناماقوڵی لەلایەن عەقڵەوە تا ئاستێکی ترسناک لەتەواوی جیهاندا لەپەرەسەندن و گەشەکردندایە . گەمەکانی سیاسەت ، فێڵ و تەڵەکە ئابووریەکان ، داهێنانە کتوپڕەکانی تەکنەلۆژیا ، زەمینەیەکی لەباریان بۆ ئەو دۆخە عەبەسیانەی عەقڵ ڕەخساندووە کە بەئاسانی ناماقوڵی قبوڵ بکات ..
ئەو پەڕی ناماقوڵیەتە لە سەدەی بیستویەکەمدا مەلایەک ڕاچێتەی میزی حوشتر بۆ نەخۆش بنوسێت ، کە ئەمە عەبەسکردنە بە بنەما پزیشکیەکانی تەندروستی . هیچی کەمتر نیە لەو عەبەسەی هێزێکی چەکداری وەکو داعش لە خۆرهەڵاتی ناوەڕاست و جیهاندا عەبەسە فیکری و ناماقوڵیەکانی خۆی ئەنجام دەدات . لەبەرانبەردا  ناماقوڵیەکانی داعشیشدا  وەک پەرچەکردارێک ، ناماقوڵیەتی خۆرئاوا ملی عەقڵی خۆی دەنێت بەو عەبەسەوە کە بە خواست و ئیرادەی خۆی ، دەنگی سیاسی  دەدات بە دۆناڵد ترامپ . لەدەرەوەی هەموو بنەما ئابووری و سیاسیەکانی دیموکراسیەت و عەقڵانیەتدا ، شێتۆکەیەکی  هەڵەشە بە سەرۆکی  گەورەترین دەوڵەتی دنیا و خۆیان پەسەند و قبوڵ دەکەن .  
ئەم قۆناغە عەبەسی و ناماقوڵەی کۆعەقڵی مرۆڤایەتی بە ئاسانی تێپەڕنابێت . یەکێک دەبێت لە قۆناغە سەخت و پڕ لەکارەساتەکانی مێژووی مرۆڤایەتی . هاوشێوەی قۆناغەکانی سەرەتا و ناوەڕاستی سەدەی بیستەمە. لەو دوو قۆناغەدا کرانەوە و بازدانە ئابووری و تەکنەلۆژیەکان ، گیڤبوونەوەی هەستە نەتەوەییە دژبەیەکەکان ، عەبەسە ناماقوڵیەکانی شەیدا بە زەعیم و سەرکردە و ڕابەرە شەعبی و وتاربێژەکان ( مۆسۆلۆنی ، هیتلەر ، ستالین ، چەرچڵ ، دیگۆل) لێکچووی ( ترامپ ، پوتین ، ئەردۆغان .. هتد ) بەجیاوازی ساڵ و ڕۆژ ،  هەمان زەمینە و سەردەمی ناماقوڵیەتە لەم سەردەمدا دووبارە دەبێتەوە . 
چێژ وەرگرتن و شانازیکردن بە کوشتنەوە ، گاڵتەکردن بە عەقڵ و تیئۆرە فیکریەکان ، گۆڕانکاری لەنەخشەی سیاسی و ئاڵوگۆڕکێ لە بەڵانسی هێز و جەمسەرکانیەوە ، تەسککردنەوەی بازاڕ و ئابڵۆقەدانی ئابووری نێوان دەوڵەتان ، دەرکەوتن و پیرۆزکردنی سەرۆک و ڕابەری هەزەلی و نەخوێندەوار ، سڕبوونی بازاڕ و کەمبوونەوەی داخوازی و بەرهەمهێنان .. هتد . ئاماژە سەرەتاییەکانی ئەنجامی ئەو ناماقوڵیەتەن کە عەقڵ و عەبەس لەیەک کاتدا پێکەوە دەتوانن هەڵبکەن و ناماقوڵی بکەنە داکەوتێک لای مرۆڤ پەسەند و رەوابێت .  
لەنێوان عەقڵ و ماقوڵدا ، لۆژیک و یاسا هەیە . لۆجیک وەکو پێوەرە راستەقینە گەردوونیەکەی هێنانەدی ئاشتی وخۆشی و ئاسایش . یاساش وەکو کردەی هێنانەدی ماف و حەق . ئەگەر عەبەس جێگەی لۆژیک و یاسا بگرێتەوە حەق و ئاشتی  پاشەکشە دەکەن و لەناو واقیعی حاڵدا  جێگەیان نابێتەوە .  وەک دەزانین کە سیفەتی عەقڵ ئەوەیە پرسیار دەکات : چۆن ، کەی ، بۆچی ، لەکوێ ... هتد . ماقوڵبوونیش  گەڕانە بەشوێن پرسیارەکانی عەقڵدا ، هەوڵدانە بۆ دۆزینەوەی وەڵامەکان . بەڵام لە  بێ عەقڵیدا  ، مرۆڤ  بێ گەڕان و بێ پرسیار ، داکەوتی حاڵ قبوڵ دەکات . ملکەچی ئەو  وەڵامە ئامادەکراوانەیە کە خۆی  بەشداری لە گەڕان و دۆزینەوەیاندا ناکات . لەوێوە ناماقوڵی دروست دەبێت . داکەوتیش دەبێتە ئەو دۆخە عەبەسیانەی هەموو شتێک لەپوچیەوە  بەرەو پوچی و بێ مانایی و هیچیەتی دەبات ..

 .






:12:00:26.11.2016
زیاتر ...