سەرەتا من پاڵپشت بەو پرۆژەیەی بڵاو کراوەتەوە و هێشتا بەرەسمی پشت راست نەکراوەتەوە، ئەم سەرنجانە ئەخەمە روو:
یەکەم: گومان ئەکەم ئەم پرۆژەیە لیجنە یا دەستەیەک نوسیێتی، چونکە مەعلومە بەیەک ریتم و شێواز نوسراوە، لە راستیشدا لە پرۆژە ناچێت ئەوەندەی لە ستایڵێکی وشەریزکردنی بێبەرهەم دەچێت.
دووەم: ئەم بە ناو پرۆژەیە زۆرتر لە بەرنامەی هەڵبژاردن ئەچێت نەک پرۆژەیەکی هەنوکەیی بۆ چارەسەرکردنی قەیرانە سیاسیی و دارایی و ئابورییەکانی هەرێم. بەشی زۆری خاڵەکانی پێشتر و لە بۆنەی تردا و لە کاتی هەڵمەتەکانی هەڵبژاردندا باسی لێوەکراوەو خراونەتە روو، بەبێ ئەوەی هیچ میکانیزمێک بۆ جێبەجێکردنیان هەبێت، واتە زۆرتر لە هیواو تەمەنیات ئەچن نەک هەنگاوی کرداری.
سێیەم: رون نیە ئەم پرۆژەیە روی دەمی لە کێیە؟ موخاتەبەی کێ ئەکات؟ ئاراستەی کێ کراوە؟ کێن لایەنگرانی ئەو هەنگاوانەو کێن دژی وەستاونەتەوە.
چوارەم: پەرلەمان هیچ رۆڵێکی یەکلاکەرەوە وسەرەکی لەم پرسەدا نیە و نازانرێت چ پێگەیەکی لەو گۆڕانکاری و چاکسازیانەدا هەیە. پێ دەچێت نوسەری پرۆژەکە رۆڵی پەرلەمان بەکەمنرخ بزانێت و پێی وابێت دەبێت لە ژێر هەژمونی مەکتەب سیاسیەکاندا بێت، وەیا لانی زۆر تەنها رۆڵێکی تەشریفاتی یاسایی هەبێت.
پێنجەم: سەیر لەوەدایە لایەنێک دێت پرۆژەیەکی هەمەلایەنی سیاسی و ئابوری و دارایی پێشکەش ئەکات کە خۆی هەر لەسەرەتاوە بنیاتنەر و هاوبەشی ئەو سیستەمەیە. حزبی خاوەن پرۆژە هەر لە ١٩٩٢ و بەتایبەت تریش لە ٢٠٠٥ ەوە خاوەنی دەسەڵات و هاوبەشی دەسەڵاتە بە هەموو دیوەکانیدا. ئیتر نازانین ئایا ئەم پرۆژەیە جۆرێکە لە ئینقلابی فکری لە نێو ئەم حزبەدا، یا پیاچونەوەیە بەو هەڵانەی پێشتر کراون، یا هەنگاوی سەرلەنوێ داڕشتنەوەی سیستەمی سیاسی و فەلسەفەی ئابوری و ژێرخانی کۆمەڵگایە؟ دیارە لەلایەن هەمان کارەکتەرانی بنیاتنانی ئەو شیوازەوە!
شەشەم: لە دیوە سیاسیەکەیدا، هێشتا ترسی دڵرەنجاندنی پارتی تێدا بەدی ئەکرێت و بەشێوەیەک داڕێژراوە کە هیچ هەنگاوێکی کرداری لێهەڵنەکڕێندرێت. سەرەتا باس لە قۆناغی گوزەری سیاسی ئەکات! سەیرە پرۆژەکە تازە باسی دیموکراسیەتی گوزەر بکات. لە راستیشدا ئەو گوزەرەی نوسەری پرۆژەکە باسی ئەکات بەرەو دیموکراسیەت نیە، بەڵکو بەرەو تەسلیم بونە بە عەقڵییەتی تاکحزبی و تاک ئیرادەیی و بەسەڵتەنەت کردن و تەوریسکردن لە کوردستاندا. دواتر دێتە سەر ئینشا نوسی و رەمڵ لێدان و ئەحکامێکی موتڵەق لەسەر دۆخی ناوچەکە و مانەوەی رژێمەکان و ریزبەندیە جیهانیەکان کە پێم وانیە هیچ پەیمانگایەکی سیاسی ناوداری جیهانیش جورئەتی ئەو لێکدانەوە خێرایانە بکات و ئەحکامی ئاوا عمومی بنوسێت.
حەوتەم: لە کاتی قسەکردنیش لەسەر ئەسڵی کێشە سیاسیەکەی ئێستای هەرێم، کە پۆستی سەرۆکی هەرێمە وپارتی ئامادە نیە بە عەمەلی دەسبەرداری بێت، ئەم پرۆژەیە لەبری ئەوەی بەرەو هەنگاوێکمان ببات کە رێزگرتن بێت لە یاساو سیستەم، کەچی پرسەکە وا ئاڵۆز ئەکات وەک ئەوەی ئێمە لە سەرەتای ١٩٩٢ دابین، واتە چەند هەنگاوێک بەرەو دواوەمان ئەبات ،کە مەعلومە ئەمەش هەر بۆ دڵرازی کردنی پارتییە. ئەم پرۆژەیە لە بری ئەوەی باس لە هەمواری یاسای سەرۆکایەتی هەرێم بکات لە لایەن پەرلەمانەوە، لانی کەم بۆ ئەم قۆناغە، کەچی دێت پێش ئەوە باس لە هەیئەیەکی سەرۆکایەتی ئەکات، وەیا رازیبون بە ئەمری واقع لە پێناو چەند بەڵێنێکدا، وەک لە پێشنیازی سێیەم بە تەم و مژاوی باسی لێوە ئەکرێت.
هەشتەم: سەیرو سەمەرە ترین بەشی ئەم پرۆژەیە لە بەشە ئابوریەکەیدایە. سەرباری ئەوەی وەک باسم کرد ئەم بەشە زۆرتر لە بەرنامەی کەمپینی هەڵبژاردن و وشە ریزکردن دەچێت، کەچی هەر لەسەرەتاوە تازە بەتازە باس لە سیستەمی ئابوری و شوناسی حوکمڕانی ئەکات. باسکردنی ئەو چەمکانە بەو سادەیی و کاوەخۆییە، تەنها نیشانەی روحی شاعرێتی ئەم پرۆژەیەیە کە پڕاوپڕە لە خەونە بەدیی نەهاتو و دروشمە ئەزەلیەکانی دەسەڵاتی کوردی، دەنا کەس جورئەتی ئەوە ناکات لە ساڵی ٢٠١٧ و لە پرۆژەیەکدا بۆ چارەسەری قەیرانی دەسەڵات، باس لە خۆساغکردنەوە بکات لە نێوان فەلسەفەی مەدەنی و دونیایی وەیا فەلسەفەی تردا!!، ئاخۆ مەبەستی ئەو زاتەی ئەم پرۆژەیەی نوسیوەو ئەو زاتانەی پیاچونەوەیان بۆ کردووە لە فەلسەفەی دونیایی چی بێت؟ ئەی ئەبێ فەلسەفەی تر چیبێت؟؟ ئایا فڕێدانی ئەم دەستەواژانە بۆ نێو پرۆژەی حزبێکی وەک یەکێتیی، تەنها پڕکردنەوەی حەزە ئایدۆلۆجیەکانی نوسەرە یا مەترسی گەورەی دابەشبونی فەلسەفەی سیاسی لە کوردستاندا هەیە لە نێوان دونیاییەکان و نا دونیاییەکاندا؟؟
نۆیەم: بابەتە دارایی و مەسەلەی فەرهودکردنی سەدان هەزار دۆنم ئەرز و باغ و رەز با بۆ شارەزایان بمێنێتەوە، من تەنها دوا سەرنجی خۆم ئەڵێم لەسەر ئەم پرۆژەیە:
ئەسڵ وابوو یەکێتیی دوا قسەی خۆی بکات لەسەر پرسی کێشەی سەرۆکی هەرێم( با بۆ جەدەلیش بڵێین سەرۆکایەتی پەرلەمانیش)، ئەمە پێویستی بە نەخشە رێگایەکی چەند دێڕی هەبوو، دواتر بۆ پرسەکانی تر ئەوا یەکێتی خۆی شەریکەو لەدەسەڵاتدایەو لە پەرلەمانە، ئەیتوانی ئەو پرسانە لە شێوەی یاساو بڕیاردا پێشکەش بە پەرلەمان بکات، بەڵام ئەو هاتوە بۆ ئاڵۆزاندنی ئەو پرسە سەرەکیە، یەک دەرزەن بابەت و مەسەلەی تری تێهەڵکێشکردوە، تەنها بۆ ئەوەی دوو قسەی حسابی لەسەر ئەو پرسە نەکات. بە کورتی پێم وانیە ئەم نەخشە رێگایە بۆ چارەسەر بێت، بەڵکو گەر گۆڕانکاری تێدا نەکرێت ئەوە تەنها بۆ ون کردنی ئەسڵی کێشەکان و ئالۆزاندنی زیاترێتی.
بەکورتیش ئەم نەخشەیە ئەوەندەی چاوی لە هاوبەشیەکی ستراتیجی قوڵدایە لەگەڵ پارتی و خولانەوە لە مەداری پارتیدا، ئەوەندە بەو نیازەوە نەنوسراوە کە لەناوەرۆکەکەیدا ئاماژەی پێدراوە.