لێرەدا جێی خۆیەتی بەڕوون و ڕاشکاوی ئەوە بڵێین کە (بەداخەوە) هەندێ ئاماژە و لێدوان هەن لەهەرێمەوە دەدرێن، رێک ئاو لە ئاشی ئەو دەنگە دژە کوردیانە دەکەن و دەبنە کارت و پاساوی بەهێزی دەستیان بۆ پەیداکردنی پشتیوانی بۆ بۆچوونەکانیان، یەکەمیان ئەو زانیاریانەن کە رۆژانە دەگەنە بەغدا و کاربەدەستانی حکومەتی فیدرالی، کە بڕی ئەو نەوتەی تەسلیمی کۆمپانیای (سۆمۆ) دەکرێت، نەک هەر زۆر لەوە کەمترە کە رێککەوتنی لەسەر کراوە (٢٥٠ هەزاری هەرێم و ٣٠٠ هەزاری کەرکوک)، بەڵکو زۆر لەوەش کەمترە کە گەیشتۆتە بەنداوی جیهان، دووەمیشیان ئەو لێدوانە ناسیاسی و ناوردانەن کە ناوە ناوە لەلایەن هەندێ پەرپرسی هەرێمەوە دەدرێن و (بە شەفافیەتەوە) باس لەبەرزکردنەوەی ئاستی بەرهەمهێنانی نەوتی هەرێم دەکەن و هیچ حسابێک بۆ ئەوە ناکەن کە ئەم ژمارانە لەلایەن نەیارانی رێککەوتنەکەی (بەغدا و هەولێر)ەوە دەقۆزرێنەوە بۆ کۆنترۆڵکردنی فرۆشتنی تەوای نەوتی هەرێم لەرێگەی بەغداوە..

بۆیە لەم کاتە هەستیارەدا ناهەقییەکی گەورەیە بەرامبەر مافەکانی کورد دەکرێت کە هەنگاوی ناسییانە لەلایەن هەندێ ناوەند و بەرپرس لەهەرێم دەنرێن بێ ئەوەی تابلۆ عیراقییەکە بە تەواوی و وەک خۆی ببینن و بخوێننەوە..سەرەنجام ئێمە و کورد و هەرێمیش ئیحراج و دەمکورت دەکەن و زمانی دژەکانمان درێژتر و زاڵتر دەکەن. تکایە ئیتر واز لەم یارییە بهێنن و چیتر ئیحراجمان مەکەن.